«Ազիմուտ»-ը Բաշկիրիայից թռիչքներ է սկսում Թբիլիսիի ուղղությամբ

Հունվարի 26-ից Sukhoi Superjet 100 օդանավը շաբաթական մեկ անգամ թռիչքներ կկատարի Ուֆա-Թբիլիսի-Ուֆա երթուղով։ Օդանավակայանի տեղեկություններով՝ թռիչքները կիրականացնի իրենց ռազմավարական գործընկեր «Ազիմուտ» ավիաընկերությունը։

«Թռիչքի տևողությունը 3 ժամ է։ Տոմսերն արդեն վաճառվում են»,- ասվում է օդանավակայանի կայքում հրապարակված հաղորդագրության մեջ։

Վրաստանի Քաղաքացիական ավիացիայի գործակալության թույլտվությամբ «Ազիմուտ»-ն արդեն իրականացնում է թռիչքներ՝ Մոսկվա-Թբիլիսի, Միներալնիե Վոդի-Թբիլիսի, Սոչի-Թբիլիսի և Մոսկվա-Բաթումի երթուղիներով։

Սաքստատ-ի տվյալներով՝ 2023 թվականի առաջին երեք եռամսյակում Վրաստան է այցելել 1 686 200 օտարերկրյա այցելու։ Նրանցից 383 հազարը Ռուսաստանի քաղաքացիներ են եղել։

2023 թվականի մայիսի 10-ին Ռուսաստանի նախագահ Վլադիմիր Պուտինը հրամանագիր է ստորագրել Վրաստանի հետ օդային հաղորդակցությունը վերականգնելու մասին, որը դադարեցվել էր գրեթե չորս տարի առաջ։ Բացի այդ, չեղարկվել է Վրաստանի քաղաքացիների համար 2000 թվականից գործող վիզային ռեժիմը։ Արդեն մայիսի 19-ին «Ազիմուտ»-ի առաջին ինքնաթիռը վայրէջք է կատարել Թբիլիսիի միջազգային օդանավակայանում, իսկ մայիսի 20-ին Georgian Airways-ը Թբիլիսիից ուղևորներ է տեղափոխել Մոսկվա։ Հուլիսից ռուսական մեկ այլ՝ Red Wings ավիաընկերությունը սկսել է թռիչքներ իրականացնել Մոսկվա-Քութայիսի երթուղով։

Ուկրաինայում պատերազմի պատճառով Եվրամիությունը և մի շարք երկրներ պատժամիջոցներ են սահմանել Ռուսաստանի ավիացիոն հատվածի դեմ՝ արգելված են թռիչքները ինչպես Ռուսաստանից, այնպես էլ դեպի Ռուսաստան։ Եվրամիությունը կոչ է արել Վրաստանին միանալ պատժամիջոցներին։

Վրաստանի և Ռուսաստանի միջև օդային հաղորդակցությունը դադարեցվել է 2019 թվականից՝ Մոսկվայի միակողմանի որոշմամբ։ Դրա պատճառը ռուս պատգամավոր Սերգեյ Գավրիլովի՝ Թբիլիսի կատարած այցից հետո սկսված զանգվածային բողոքի ցույցերն էին։