ABŞ dövlət katibinin məsləhətçisinin müavini Coşua Hak Konqresdə Gürcüstanla bağlı keçirilən dinləmələrdə “Gürcü Arzusu” hökumətinin ikili oyun oynamağa çalışdığını bildirib.
Əsas xəbərlər
“İndi “Gürcü Arzusu” hökumətinin ikili oyun oynamağa çalışdığını dərk etmək çox vacibdir.
Onlar ABŞ-ı tənqid etmək, avropalı tərəfdaşlarını tənqid etmək və eyni zamanda öz xalqına hələ də Avropa İttifaqına daxil olmaq yolunda olduqlarını söyləmək istəyirlər. Bu qeyri-dürüstlükdür. Düşünürəm ki, bizim və beynəlxalq ictimaiyyətin gürcü seçicilərinə və gürcü xalqına aydın seçim olduğunu söyləməyimiz vacibdir. Qərarı onlar özləri verməlidirlər, lakin “Gürcü Arzusu”nun onları apardığı yol gürcü xalqının istədiyi transatlantik gələcəyə aparmır”, - deyə dövlət katibinin köməkçisinin müavini bildirib.
O, çıxışında həmçinin qeyd edib ki, 2024-cü il Gürcüstanın gələcəyi üçün həlledici ildir və ABŞ Gürcüstan hökuməti ilə azad və ədalətli seçkilərin təmin edilməsinin vacibliyini vurğulayıb.
Gürcüstanın baş naziri İrakli Kobaxidze bu gün keçirilən brifinqdə Konqresdə səslənən fikirləri şərh edib və “çox ədalətsiz qiymətləndirmələr” eşitdiyini deyib. Onun sözlərinə görə, “əslində bu, konkret siyasətçilərin Gürcüstan dövlətinə hücumu idi”. Baş nazir həmin brifinqdə bəyan edib ki, bu gün “Gürcü Arzusu”nun alternativi yoxdur.
