Dünya liderləri həbsdə olan rusiyalı müxalif siyasətçi Aleksey Navalninin ölümünə reaksiya bildirir. İlk açıqlama verənlərdən biri Latviya prezidenti Edqar Rinkeviç olub. O, deyib ki, Navalni Rusiya hakimiyyəti tərəfindən öldürülüb.
Əsas xəbərlər
“Bir siyasətçi olaraq Aleksey Navalni haqqında nə düşünsəniz də, o, bu yaxınlarda Kreml tərəfindən vəhşicəsinə qətlə yetirilib. Bu bir faktdır və indiki Rusiya rejiminin əsl mahiyyəti haqqında bilinməsi lazım olan budur. Ailəsinə və yaxınlarına başsağlığı verirəm”, - Rinkeviç dedi.
Rusiya hökumətinin məsuliyyətindən Avropa İttifaqının liderləri də danışırlar:
“Aleksey Navalni azadlıq və demokratiya dəyərləri uğrunda mübarizə aparırdı. O, ideallarına qurban getdi. Avropa İttifaqı bu faciəli ölümə görə tamamilə Rusiya rejiminə məsuliyyət atır. Böyük kədər hissi ilə onun ailəsinə və dünyanın ən ağır şərtlərində demokratiya uğrunda mübarizə aparan hər kəsə başsağlığı verirəm. Döyüşçülər ölür. Amma azadlıq uğrunda mübarizə heç vaxt bitmir”, - Şarlz Mişel, Avropa Şurasının prezidenti.
“Çox cəsur bir adam olan Aleksey Navalninin ölüm xəbərinə görə mən şokdaysam. O, həyatını Rusiyanın ləyaqətini xilas etməyə həsr etdi və demokratlara və vətəndaş cəmiyyətinə ümid verdi. Əlavə məlumat gözləyənə qədər, biz aydın şəkildə deməliyik: Bu məsuliyyət yalnız Putinin üzərinə düşür”, - Cozef Borrell, Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi.
“Bu, qorxunc bir xatırlatmadır ki, Putin və onun rejimi nədir. Avtokratiyaya qarşı çıxmağa cəsarət edənlərin azadlığını və təhlükəsizliyini qorumaq üçün mübarizəmizdə birləşək”, - Ursula fon der Leyen, Avropa Komissiyasının sədri.
Almaniya kansleri Olaf Şolz Navalninin ölümündən dərin kədərləndiyini bildirib. O, deyib ki, Navalni Rusiyada demokratiya və azadlığı dəstəkləmək üçün mübarizə aparıb. “Belə görünür, onun igidliyi onun həyatı bahasına başa gəlib. Bu dəhşətli hadisə bir daha Rusiyanın necə dəyişdiyini və Moskvada hansı rejimin hakimiyyətdə olduğunu göstərir”, - Şolz qeyd edib.
“Aydındır ki, onu Putin öldürüb”, - Bunu Ukrayna Prezidenti Volodimir Zelenski deyib. O, qeyd edib ki, Vladimir Putin üçün kimin ölməsinin fərqi yoxdur, əsas odur ki, o, öz mövqeyini qorusun.
“Məhz buna görə də o heç nəyi saxlaya bilməməlidir. Putin itirməli, hər şeyi itirməli və etdiyinə görə cavab verməlidir”, - Zelenski bildirib.
Fransa prezidenti Emmanuel Makron deyib ki, bugünkü Rusiyada azad ruhlar Qulaqlara göndərilir və ölüm hökmü verilir. “Aleksey Navalninin xatirəsini, fədakarlığını, cəsarətini ehtiramla yad edəcəyəm”, - Makron qeyd edib.
Hadisəyə Gürcüstan prezidenti də reaksiya verib. Salome Zurabişvili deyir ki, Aleksey Navalninin ölümü demokratiya və insan haqları müdafiəçiləri üçün faciədir. “Ailəsinə və Rusiyada demokratiya uğrunda mübarizəsini davam etdirən insanlara başsağlığı verirəm”, - Zurabişvili sosial şəbəkədə yazıb.
“NATO”nun baş katibi Yens Stoltenberq qeyd edib ki, Aleksey Navalni illərdir demokratiya və azadlığın səsi olub.
“NATO və müttəfiqləri uzun müddətdir ki, onun dərhal azad edilməsini tələb ediblər. Hələlik ölüm səbəbləri ilə bağlı məlumatımız yoxdur, ona görə də faktları təsdiqləmək lazımdır. Rusiya onun ölümünə səbəb olan bir çox ciddi suallara cavab verməli olacaq. Rusiya getdikcə daha çox avtoritarlaşır. Müxalifəti öz ölkələrində təqib edir, sıxışdırır. Ailəsinə başsağlığı verirəm. Biz demokratiya və azadlığın tərəfində olan hər kəsi dəstəkləyəcəyik”, - Stoltenberq bildirib.
“Bu dəhşətli hadisədir. Rusiyanın ən çoşqun demokratiya müdafiəçisi kimi Aleksey Navalni həyatı boyu inanılmaz cəsarət göstərdi. Mənim fikirlərim bu böyük faciənin olduğu onun həyat yoldaşı və Rusiya xalqı ilədir”, - Bu barədə Böyük Britaniyanın baş naziri Rişi Sunak bildirir.
“Aleksey Navalninin ölümü məni çox sarsıtdı. Biz onun ölüm şəraitinin aydınlaşdırılmasını tələb edirik”, - Bu barədə İspaniyanın xarici işlər naziri Xose Manuel Albares bildirib. O, qeyd edib ki, rusiyalı müxalifətçi siyasi motivlərlə qanunsuz olaraq həbs edilib.
ABŞ dövlət katibi Entoni Blinken də bildirib ki, Navalninin həbsxanada ölümünə görə Rusiya hakimiyyəti məsuliyyət daşıyır.
Bu gün, fevralın 16-da məlum olub ki, rusiyalı müxalif siyasətçi Aleksey Navalni üç illik həbsdən sonra həbsxanada dünyasını dəyişib. Federal İslah Xidməti bildirib ki, məhbus gəzintidən sonra özünü pis hiss edib və demək olar ki, dərhal huşunu itirib. “Bütün lazımi reanimasiya tədbirləri görülsə də, müsbət nəticə verməyib. Təcili yardım həkimləri məhkumun ölümünü təsdiqləyiblər. Ölümün səbəbləri müəyyən edilir”, - qurum bildirir.
Navalni 19 il müddətinə azadlıqdan məhrum edilib. 2023-cü ilin sonundan o, cəzasını xüsusi rejimli “Полярный волк” (“Qütb canavarı”) koloniyasında çəkirdi. Sözügedən koloniya Sibirdə, Yamal yarımadasında, Xarp qəsəbəsində yerləşir.
