Gürcüstan əhalisinin əksəriyyəti Rusiya vətəndaşları üçün viza rejiminin tətbiqini dəstəkləyir. “Milli Demokratiya İnstitutu”nun (MDİ) araşdırmasına görə, “Gürcüstan hökuməti Rusiya vətəndaşları üçün viza rejimi tətbiq etməlidirmi?” – sualına respodentlərin 69 %-i müsbət cavab verib, 21 %-i mənfi, 10 % isə bilmədiyini deyib.
Əsas xəbərlər
Viza rejiminin tətbiqinə dəstək Tbilisidə (79 %), 18-34 yaşlı insanlar (74 %), qadınlar (72 %) və müxalifət tərəfdarları (79 %) arasında daha çoxdur. Etnik azlıqların yaşadığı yaşayış məntəqələrindəki vətəndaşların bu məsələdə dəqiq mövqeyi yoxdur. Belə ki, 32 %-i viza rejiminin tətbiqinin tərəfdarıdır, 37 %-i tərəfdarı deyil, 31 % isə "bilmədiyini" deyir.
Gürcüstan Daxili İşlər Nazirliyinin sərhəd keçid statistikasına əsasən, 2022-ci ildə 1.459. 541 Rusiya vətəndaşı Gürcüstan sərhədini keçib. 2021-ci illə müqayisədə artım 401 % təşkil edir.
Araşdırmaların nəticələrinə görə, Gürcüstan vətəndaşlarının Rusiya hökumətinə münasibəti mənfidir. Belə ki, 2022-ci ilin mart ayında respondentlərin 85 %-i mənfi münasibət bəslədiyini deyirdisə, ilin sonunda, dekabrda bu göstərici 80 % olub. Rusiya hökumətinə ən müsbət münasibət etnik azlıqların məskunlaşdığı yerlərdədir (44 %). Respondentlərin yalnız 34 %-i mənfi münasibət bəslədiyini deyir, 19 %-i isə “bilmirəm” cavabını verib.
Rusiya hökumətinə münasibətdən fərqli olaraq, əhalinin əksəriyyəti (56 %) rus xalqına müsbət münasibət bəsləyir.
Əksəriyyət, yəni respondentlərin 69 %-nin fikrincə, rusların Gürcüstana daxil olması ölkəyə mənfi təsir göstərə bilər, 17 %-i müsbət təsir göstərəcəyini, 8 %-i bunu “bilmədiyini”, 6 %-i isə heç bir təsir göstərməyəcəyini hesab edir.
Sorğunun nəticələrinə görə, Tbilisidə respondentlərin 74 %-i Rusiya vətəndaşlarının Gürcüstana girişinin ölkəyə mənfi təsir göstərə biləcəyini düşünsə də, etnik azlıqların məskunlaşdığı yerlərdə əksəriyyət (38 %) rusların immiqrasiyasından fayda gözləyir. Onların yalnız 36 %-i Rusiya vətəndaşlarının ölkəyə girişinin mənfi təsir göstərə biləcəyinə inanır, 23 %-i isə bilmədiyini deyir.
Əksəriyyət – 57 % üçün hökumətin Rusiya vətəndaşlarının ölkəyə girişinə yanaşması qəbuledilməzdir, 29 %-i bunu məqbul hesab edir, 13 %-i bilmədiyini deyir. Rusiya vətəndaşlarının ölkəyə girişi ilə bağlı dövlət siyasətini tənqidi qiymətləndirənlər ən çox Tbilisi əhalisi (64 %), qadınlar (61 %) və müxalifət tərəfdarlarıdır (71 %).
Tədqiqat ölkə miqyası üzrə üzbəüz sorğu üsulu ilə dekabrın 3-dən dekabrın 20-dək aparılıb. Orta xətanın sərhəddi ±1,6 %-dir.
