Hökumətin bugünkü iclasında Baş Nazir İrakli Qaribaşvili ərzaq və neft idxalçılarını tənqid edib və deyib ki, onlar demək olar ki, 100 % qiymət artımı ilə çox yüksək mənfəət marjası ilə işləyirlər. Baş nazir iqtisadiyyat, maliyyə və kənd təsərrüfatı nazirlərinə təcili olaraq işçi qrup yaratmağı, bütün iri idxalçıları çağırmağı və qiymətləri hansısa ağlabatan həddə endirməyi tapşırıb.
Əsas xəbərlər
“Mən bir neçə həftə əvvəl Konkurensiya Agentliyinə göstəriş vermişdim ki, ərzaq məhsullarının qiymətlərini öyrənsinlər. Maraqlanırdım, idxalçılar nə qədər vicdanla, ağlabatan marjalarla, mənfəətlə işləyir. Nəticə həqiqətən narahatlıq verici idi və mən bu ilkin tədqiqat nəticələrini ictimaiyyətə təqdim etmək istərdim.
Əsas məhsullar üzərində işlədik və məlum oldu ki, məsələn, düyü və ya qarabaşaq yarması, makaron, qənd, duz, yağ, topdansatış qiymətlərinin mənfəət marjası 50-60-70-80 faiz təşkil edir. Bunun üzərinə pərakəndə satış qiymətləri, bahalaşma, ən azı 25-30 faiz əlavə olunur və belə çıxır ki, ümumilikdə əhalimiz, insanlarımız demək olar ki, 100 faiz baha almalı olur ki, bu da qətiyyən yolverilməzdir. İnsanların hesabına bu cür varlanmaq olmaz, bu yanlış davranışdır.
Ona görə də mən İqtisadiyyat, Maliyyə və Kənd Təsərrüfatı nazirlərinə tapşırmaq istəyirəm ki, təcili olaraq işçi qrupu yaradıb, bütün o iri idxalçıları çağırıb, bu məsələləri öyrənməyə başlasınlar və müvafiq tənzimləmələr həyata keçirsinlər. Ən çoxu iki həftədən sonra mən masa üzərində müvafiq həlləri olan tam mənzərəni görməliyəm”, - bildirib Qaribaşvili.
Gürcüstanda işsizlik və yoxsulluq tarixi minimumdadır – Qaribaşvili
Baş nazirin sözlərinə görə, neft idxalçıları da yüksək gəlirlə işləyirlər ki, bu da yolverilməzdir – “bir litr benzindən az qala 1 lari gəlir əldə etmək olmaz”.
“Mənim göstərişimlə Konkurensiya Agentliyi neft bazarını öyrənməyə başladı. Fevralın sonunda onlar rəsmi təsdiqlənmiş yekun mənzərəni təqdim edəcəklər. Burada da bizim müdaxiləmiz nəticəsində qiymətlər tənzimləndi, qiymətlər aşağı salındı, amma dekabr məlumatları indi mənə gəlir və burada da görürəm ki, yüksək marjalar var və neft idxal edənlər hələ də yüksək gəlirlə işləyirlər, hansı ki, bu da qəbuledilməzdir. Cənab nazirlər, sizə müraciət etmək istəyirəm ki, neft idxalçılarını çağırıb qiymətləri münasib səviyyəyə endirin.
Bir litr benzindən 80, 90 tetri və haradasa 1 lari gəlir əldə etmək olmaz.
Ona görə də bunun çox yaxşı araşdırılması lazımdır və ümid edirəm ki, bizim bu çağırışımız və mövqeyimiz nəzərə alınacaq və hesabat veriləcək. Bu məsələni tez bir zamanda həll etmək lazımdır. Bu bizim prinsipial mövqeyimdir. Dərmanlar mövzusunu xatırlayırsınız, idxalçılar tərəfdən etirazlar çox idi, amma məlum oldu ki, bu məsələni çox asanlıqla həll etmək olar. Ona görə də inanıram ki, bu insanlar, həmvətənlərimiz, idxalçılar xalqımızın vəziyyətini, mövcud vəziyyəti nəzərə alıb qiymətləri aşağı salmağa başlayacaqlar. Bu məsələyə daimi nəzarət və diqqət lazımdır ki, heç kimin tamahı tutmasın. Əvvəllər danışırdılar ki, larinin məzənnəsi çox yüksəkdir, 3,3, 3,4-dür və ona görə də qiymətləri endirə bilmirdilər. Apardığımız işlərin nəticəsidir ki, milli valyuta 2,60 səviyyəsində sabitləşib, demək olar ki, 2,65-ə çatıb və bu adamlar qiymətləri eyni həddə saxlayıblar, sadə və düzgün desək, yanlışdır”, - Baş nazir qeyd edib.
Milli Demokratiya İnstitutunun (NDI) fevralın 2-də yayımladığı araşdırmaya əsasən, qiymət artımının ailələrin maliyyə imkanlarına təsiri respondentlərin 77 %-ni narahat edir. “NDI” araşdırması tarixində ilk dəfə baş verən ən mühüm məsələ kimi qiymət artımı qeyd edilib.
