Rusiya işğalçı qüvvələrinin nümayəndələri Kareli bələdiyyəsinin işğal xətti yaxınlığında yerləşən Çvirinisi kəndində yerli sakinlər Mevlud Xarazişvili və Elza Qoqaladzeyə hücum edərək, onları qaçırmağa cəhd ediblər. Ər və arvad Gürcüstanın mərkəzi hökumətinin nəzarətində olan ərazidə mal-qara otarırmışlar. İşğalçılar 53 yaşlı Mevlud Xarazişvilini təpiklər və silahın qundağı ilə döyüblər.
Əsas xəbərlər
Yerli əhalinin sözlərinə görə, hücum aprelin 21-də, günorta saatlarında baş verib. Hadisə ilə bağlı döyülən kişinin həyat yoldaşı jurnalistlərə açıqlama verib: “Kəndin mal-qarasını otararkən iki rus işğalçısının hücumuna məruz qaldıq. Bizi qaçırmağa çalışdılar, amma biz bunun öhdəsindən gəldik, qaçdıq. Kifayət qədər uzun məsafəyə qaçmalı olduq. Bundan sonra ərimi tutdular, sürüyüb apardılar və əllərini sıxmağa çalışdılar, ayağımıza da iki dəfə təpiklə vurdular. Qonşularımıza kömək etmələri üçün qışqırdım. Doğrudan da səsi eşidib çölə çıxdılar, amma yaxınlaşa bilmədilər, heç kim bizə kömək edə bilmədi. Bu zaman bizim polislər də peyda oldu, onları görən kimi qaçdılar. Ərimin ombası əzilib, qaşı çatlayıb, başı ağrıyır”.
Bu gün Mevlud Xarazişvili təcili tibbi yardım briqadası tərəfindən xəstəxanaya aparılıb. Avropa İttifaqının monitorinq missiyasının nümayəndələri də Çvrinisə gəliblər.
“Vəziyyət hər cəhətdən mürəkkəbdir. Artıq bu kənddə yaşamaq mümkün deyil, heç bir şəraiti yoxdur. Tez-tez bu tərəfə keçirlər [işğalçılar]. İstədikləri vaxt keçəcəklər, qarşılarında kim duracaq? Onların trafareti var idi və artıq o da yoxdur, biz daha nə qədər uzağa getməli olduğumuzu və nə qədər getməli olduğumuzu anlaya bilmirik”, - yerli sakinlərdən biri deyir.
Gürcüstan iki vətəndaşının qanunsuz həbs edilməsinə cəhd barədə aprelin 21-də Gürcüstanın Dövlət Təhlükəsizliyi Xidməti məlumat yayıb, lakin, hücum barədə rəsmi açıqlamada onlar haqqında heç nə deyilməyib. DTX bildirir ki, mərkəzi hökumət aprelin 27-də Ergnetidə keçirilməsi planlaşdırılan Hadisələrin Qarşısının Alınması və Cavab Mexanizminin (IPRM) növbəti iclasında sözügedən məsələni “ciddi şəkildə qaldıracaq”.
Aprelin 17-də işğalçı qüvvələrin nümayəndələri Kareli bələdiyyəsinin Dvani kənd sakini, 32 yaşlı Dimitri Mamaqlulaşvilini qondarma sərhəd rejimini pozmaqda ittiham edərək həbs edib. Gürcüstan vətəndaşı Sxinvali təcridxanasından aprelin 20-də buraxılıb. Qondarma Cənubi Osetiya Təhlükəsizlik Komitəsi məhkəmənin Mamaqulaşvilini dövlət sərhədini pozmaqda təqsirli bilib və inzibati qaydada cərimələdikdən sonra “Respublika”dan xaric edildiyini açıqlayıb.
