Çeçenistan lideri Ramzan Kadırov bildirir ki, “Vaqner” qruplaşması şəhəri tərk edərsə, o, öz döyüşçülərini Baxmuta göndərməyə hazırdır.
Əsas xəbərlər
“Əgər böyük qardaş Priqojin və “Vaqner” getsə, Baş Qərargah təcrübəli döyüş bölməsini itirəcək. Onların yerinə Baxmuta kiçik qardaş Kadırov və “Axmat” gələcək. Əgər ssenari hələ də belə inkişaf etsə, döyüşçülərimiz şəhəri tutmağa hazırdır, bu, bir neçə saat məsələsidir. Priqojin və onun komandası getsə, Kadırov və onun heyəti gələcək, heç nə dəyişməyəcək”, - Kadırov deyir.
Özəl hərbi şirkət olan “Vaqner” Rusiya Prezidenti Vladimir Putinə yaxınlığı ilə bilinən iş adamı Yevgeni Priqojin tərəfindən yaradılmış qeyri-rəsmi Rusiya silahlı birləşməsidir. Aralarında Rusiya həbsxanalarından çıxarılmış keçmiş məhbusların da olduğu muzdlu döyüşçülərlə “Vaqner” Rusiyanın Ukraynaya qarşı müharibəsində fəal iştirak edir.
Mayın 5-də Yevgeni Priqojin Baxmutda döyüşçülərinin ölümündə Rusiyanın müdafiə naziri Sergey Şoyqu və Silahlı Qüvvələrin Baş Qərargah rəisi Valeri Gerasimovu günahlandırıb. Cəsədlərin fonunda çəkilmiş videoda Priqojin bildirib ki, “Vaqner”in itkilərinin səbəbi döyüş sursatı çatışmazlığıdır. O, onları muzdluların mayın 10-dan Baxmutu tərk edəcəkləri ilə hədələyib, baxmayaraq ki, “Vaqner” komandirinin sözlərinə görə, onlar Ukraynanın bu şəhərini mayın 9-dək almağı planlaşdırırdılar.
Baxmut uğrunda döyüş doqquz aydan çoxdur ki davam edir. Amerikanın “Müharibənin Tədqiqi İnstitutu” (ISW) təşkilatının məlumatına görə, göründüyü kimi, Rusiya Müdafiə Nazirliyi Baxmuta hücum əvəzinə Ukraynanın gözlənilən əks-hücumuna hazırlığa üstünlük verib ki, bu da “Vaqner”qruplaşması və onun maliyyəçisi Priqojini çətin vəziyyətdə qoyub. “Priqojinin mayın 10-da Baxmutdan geri çəkilmək niyyətində olub-olmaması, yoxsa onun bəyanatının Müdafiə Nazirliyindən dəstək əldə etmənin son addım olub-olmaması hələ aydın deyil”, - “ISW” yazır.
Mayın 5-də Rusiyanın Müdafiə Naziri “xüsusi hərbi əməliyyat zonası”na silahların çatdırılmasına nəzarət etmək üçün göstəriş verib.
