Latviya prezidenti Edqars Rinkeviç “Riga StratCom Dialogue 2024”də çıxışı zamanı Avropa İttifaqının Gürcüstanla bağlı siyasətini tənqid edib. Bu barədə məlumatı Latviya Müdafiə Nazirliyinin yaratdığı Sargs.lv portalı yayıb.
Əsas xəbərlər
Prezident vurğulayıb ki, Gürcüstandakı vəziyyət Avropa İttifaqının təcili və sərt addımlar atmasını tələb edir. Sargs.lv-in məlumatına görə, o, Rusiyanın Gürcüstanda “strateji kommunikasiya və mümkün maliyyə əməliyyatları nəticəsində yaranan” təsirinin artmasından narahat olduğunu bildirib. Edqars Rinkeviç onu da bildirib ki, vəziyyət daha da ağırlaşmaması üçün Avropa İttifaqı Gürcüstanın namizəd statusunu dayandırmaqla aydın mesaj verməlidir.
“Əgər biz çox aydın, çox güclü mesaj göndərməsək, yalnız öz narahatlığımızı ifadə etsək, o zaman vəziyyət daha da pisləşəcək”, - Rinkeviç bildirib.
O, Gürcüstan hökumətini öz xalqının istəklərini nəzərə almağa və ölkənin demokratik inkişafına mane ola biləcək xarici təsirlərə boyun əyməməyə çağırıb. Prezident vurğulayıb ki, Latviya Gürcüstanı, ancaq ölkə demokratiya və qanunun aliliyi prinsiplərinə hörmətlə yanaşsa dəstəkləyəcək.
“Gürcü Arzusu”nun parlament çoxluğu genişmiqyaslı etiraz aksiyaları, Qərb tərəfdaşlarının müraciətlərinə və prezidentin vetosuna baxmayaraq “xarici agentlər” haqqında rus qanunu təsdiqlədikdən sonra Avropa İttifaqı cavab tədbirlərini müzakirə etməyə başladı. Ölkə üzrə namizəd statusunun dayandırılması, vizasız rejimə yenidən baxılması və maliyyə yardımı məsələsi nəzərdən keçirilir. Bu məsələlərlə bağlı qərar qəbul etmək üçün bütün Aİ üzvlərinin, 27 dövlətin hamısının dəstəyi lazımdır.
