ლატვიის პრეზიდენტი მიიჩნევს, რომ ევროკავშირმა საქართველოს კანდიდატის სტატუსი უნდა შეუჩეროს

პრეზიდენტმა ხაზგასმით აღნიშნა, რომ საქართველოში შექმნილი ვითარება მოითხოვს ევროკავშირის სასწრაფო და მკაცრ მოქმედებას. Sargs.lv-ის ცნობით, მან გამოხატა შეშფოთება საქართველოში რუსეთის გავლენის გაზრდის გამო, რაც „გამოწვეულია სტრატეგიული საკომუნიკაციო და შესაძლო ფინანსური ოპერაციებით“. ედგარს რინკევიჩმა ასევე განაცხადა, რომ ევროკავშირმა უნდა გააგზავნოს მკაფიო გზავნილი საქართველოს კანდიდატის სტატუსის შეჩერებით, რათა სიტუაცია არ გაუარესდეს.

„თუ ჩვენ არ გავაგზავნით ძალიან მკაფიო, ძალიან მკაცრ გზავნილს, არამედ მხოლოდ სიტყვებით გამოვხატავთ ჩვენს შეშფოთებას, მაშინ სიტუაცია გაუარესდება“, - თქვა რინკევიჩმა.

მან საქართველოს მთავრობას მოუწოდა, გაითვალისწინოს თავისი ხალხის სურვილები და არ დაემორჩილოს გარე გავლენებს, რამაც შეიძლება ხელი შეუშალოს ქვეყნის დემოკრატიულ განვითარებას. პრეზიდენტმა ხაზი გაუსვა, რომ ლატვია მხარს დაუჭერს საქართველოს, მაგრამ მხოლოდ იმ შემთხვევაში, თუ ქვეყანა პატივს სცემს დემოკრატიისა და კანონის უზენაესობის პრინციპებს.

მას შემდეგ, რაც „ქართული ოცნების“ საპარლამენტო უმრავლესობამ მასშტაბური საპროტესტო აქციების, დასავლელი პარტნიორების მოწოდებებისა და პრეზიდენტის ვეტოს მიუხედავად, ე.წ. „უცხოეთის აგენტების“ შესახებ რუსული კანონი დაამტკიცა, ევროკავშირში საპასუხო ზომებზე მსჯელობა დაიწყეს. განიხილება ქვეყნისთვის კანდიდატის სტატუსის შეჩერება, ვიზალიბერალიზაციის და ფინანსური დახმარების გადახედვა. ამ საკითხებზე გადაწყვეტილების მიღებას ევროკავშირის ყველა წევრის, 27-ვე სახელმწიფოს მხარდაჭერა სჭირდება.