Լատվիայի նախագահը կարծում է, որ Եվրամիությունը պետք է դադարեցնի Վրաստանի թեկնածուի կարգավիճակը

Նախագահն ընդգծել է, որ Վրաստանում ստեղծված իրավիճակը պահանջում է Եվրամիության կողմից հրատապ և խիստ քայլեր։ Ըստ Sargs.lv-ի՝ նա մտահոգություն է հայտնել Վրաստանում Ռուսաստանի ազդեցության աճի կապակցությամբ, որը «առաջանում է ռազմավարական հաղորդակցության և հնարավոր ֆինանսական գործառնությունների պատճառով»: Էդգարս Ռինկևիչը նաև ասել է, որ Եվրամիությունը պետք է հստակ ուղերձ հղի՝ դադարեցնելով Վրաստանի թեկնածուի կարգավիճակը, որպեսզի իրավիճակը չվատթարանա։

«Եթե մենք չուղարկենք շատ հստակ, շատ ուժեղ ուղերձ, այլ միայն բանավոր արտահայտենք մեր մտահոգությունները, ապա իրավիճակը կվատթարանա»,- ասել է Ռինկևիչը։

Նա կոչ է արել Վրաստանի կառավարությանը հաշվի առնել իր ժողովրդի ցանկությունները և չտրվել արտաքին ազդեցություններին, որոնք կարող են խոչընդոտել երկրի ժողովրդավարական զարգացմանը։ Նախագահն ընդգծել է, որ Լատվիան կաջակցի Վրաստանին, բայց միայն այն դեպքում, եթե երկիրը հարգի ժողովրդավարության և օրենքի գերակայության սկզբունքները։

Այն բանից հետո, երբ «Վրացական երազանքի» խորհրդարանական մեծամասնությունը, չնայած բողոքի լայնածավալ ակցիաներին, արևմտյան գործընկերների կոչերին և նախագահի վետոյին, վերջնական ընդունեց այսպես կոչված «օտարերկրյա գործակալների» մասին ռուսական օրենքը, Եվրամիությունը սկսեց քննարկել պատասխան միջոցներ։ Դիտարկվում է երկրի համար թեկնածուի կարգավիճակի դադարեցումը, վիզային ռեժիմի ազատականացման և ֆինանսական օգնության վերանայումը։ Այս հարցերի շուրջ որոշում կայացնելու համար անհրաժեշտ է ԵՄ բոլոր՝ 27 անդամ պետությունների աջակցությունը։