Parlament və qeyri-parlament müxalifət partiyaları, eləcə də müstəqil deputatlar amerikalı konqresmen Co Vilsona açıq məktubla müraciət ediblər. Onlar ikipartiyalı qanun layihəsini - “Dostluq Aktı”nı irəli sürdüyünə görə ona minnətdarlıqlarını ifadə edir və onun tez bir zamanda qəbul ediləcəyinə ümid etdiklərini bildirirlər.
Əsas xəbərlər
“Ümid edirik ki, Konqres və Senat bizim dostluğumuza əsaslanan və Gürcüstan xalqına yardım və dəstəyi genişləndirən, eyni zamanda Birləşmiş Ştatlar hökumətinə Gürcüstan xalqına zülm edənlərə qarşı hərəkətə keçmək səlahiyyətini verən bu qanunvericiliyin sürətlə qəbulunu təmin etmək üçün tez və birgə işləyəcəklər. Yalnız operativ tədbirləri təmin edən, Gürcüstanın demokratiyasına xələl gətirən və insan hüquqlarını kobud şəkildə pozanlar üçün konkret nəticələr yaradan qanunvericilik bu təhlükəli kursu dəyişə və gürcü xalqına ABŞ-ın demokratiya və Avro-Atlantik gələcəyə sadiqliyində onların yanında olduğunu göstərə bilər.
Önümüzdəki aylarda, demokratiya və azadlıq uğrunda mübarizəmizi davam etdirən vətəndaşlarımızın misli görünməmiş təzyiq və zorakılıqla üzləşdiyi bir vaxtda, dövlətimizin tarixində kritik bir məqama yaxınlaşdığımız bir vaxtda, biz tərəfdaşlarımızın Gürcüstanın demokratiyasını qorumaq məqsədi daşıyan qeyd-şərtsiz dəstəyini, o cümlədən şəxsi səfərləri alqışlayırıq.
İnanırıq ki, Konqresin nümayəndə heyətinin Gürcüstana səfərləri Gürcüstanın azadlıqsevər xalqının dəstəyinə böyük təsir göstərəcək və Gürcüstan hökumətinə güclü siqnal olacaq ki, xalqın səsini zorla susdurmaq mümkün deyil”, - məktubda oxuyuruq.
Bundan əlavə, müxalifət Konqresdən oktyabrın 26-da keçiriləcək parlament seçkilərinin lazımi səviyyədə müşahidəsini təmin etməyi xahiş edir: “Biz həmçinin ABŞ Konqresindən Gürcüstanda oktyabrda keçiriləcək parlament seçkilərinin lazımi səviyyədə müşahidəsini təmin etmək üçün lazımi insan və maliyyə resurslarının ayrılmasını xahiş edirik, çünki risklər yüksəkdir və bizim Avro-Atlantik gələcəyimiz tarixi yol ayrıcında dayanır”.
Məktubu imzalayırlar: parlamentin siyasi qrupları və fraksiyaları: “Vətəndaşlar” (Aleko Elisaşvili), “Avrooptimistlər” (Roman Qotsiridze), “Milli və Demokratik Dövlət Naminə” (Nika Maçutadze), “Gürcüstan Naminə” (Beka Liluaşvili), “Azadlıq” (Nato Çxeidze), “Qirçi” (İaqo Xviçia), “Lelo - Gürcüstan Naminə Tərəfdaşlıq” (Davit Usupaşvili), “İslahat Qrupu” (Teona Akubardia), “Vahid Milli Hərəkat” (Tina Bokuçava). Müstəqil deputatlar: Armaz Axvlediani, Davit Bakradze, Tamar Çarkviani, Tamar Kordzaia, Salome Samadaşvili, Şalva Şavqulidze. Partiyalar: “Axali” (Nika Qvaramia, Nika Melia), “Droa” (Elene Xoştaria), “Qirçi - Daha Azadlıq” (Zurab Qirçi Caparidze), “Respublika Partiyası” (Xatuna Samnidze) və “Strategiya A]maşenebeli” (Qiorqi Vaşadze).
“Dostluq Aktı” haqqında.
“Gürcüstanın Hesabatlılığın, Dayanıqlığın və Müstəqilliyin Yaradılması üçün Seçimlərinin Mobilləşdirilməsi və Artırılması Aktı” (Mobilizing and Enhancing Georgia’s Options for Building Accountability, Resilience, and Independence Act) Respublikaçı Konqresmen Co Vilson tərəfindən “xarici agentlər” haqqında rus qanunun qəbuluna cavab olaraq irəli sürülüb. Qanun layihəsinin əsas müddəaları bunlardır:
Demokratiya və Qanunun aliliyinə dəstək: Akt ABŞ-ın Gürcüstanda demokratik dəyərləri, insan haqlarını və qanunun aliliyini qorumaq siyasətini müəyyən edir. O, vətəndaş cəmiyyətinin mühüm tərəqqisini tanıyır və regional sabitlik üçün demokratiyanın gücləndirilməsinin vacibliyini vurğulayır.
Demokratiyanın tənəzzülü ilə mübarizə: Gürcüstanda son vaxtlar demokratiyanın zəifləməsinə cavab olaraq, akt Gürcüstan hökumətinin hərəkətlərinə və onun Rusiya və digər avtoritar rejimlərlə əlaqələrinə daha ciddi nəzarəti tələb edir.
Hesabatlar və Sanksiyalar: Akt Dövlət Katibindən Gürcüstanda Rusiyanın maraqlarını və sanksiyalardan yayınmağı dəstəkləyən korrupsiya əməlləri, habelə Rusiya kəşfiyyatının Gürcüstana sızmasını və potensial Çin əməkdaşlığını qiymətləndirən hesabatlar təqdim etməyi tələb edir.
Qanunun qüvvəyə minməsindən sonra 60 gündən gec olmayaraq, Dövlət Katibi Gürcüstan hökumətində və ya digər təsir mövqelərində olan, Gürcüstanda demokratiya, insan haqları və təhlükəsizliyə xələl gətirən və ya zərər vuran şəxsləri müəyyən etməlidir. Akt parlamentdə rus qanununun təbliği, qəbulu və icrasına cavabdeh olan şəxslərə (eləcə də onların ailə üzvlərinə) qarşı sanksiyaların tətbiqini nəzərdə tutur. Qanun həmçinin hüquq-mühafizə və təhlükəsizlik xidmətinin əməkdaşlarına və işgüzar dairələrin nümayəndələrinə sanksiya tətbiq edilməsini də nəzərdə tutur.
Demokratiyanın monitorinqi üzrə işçi qrupunun yaradılması: Aktda ədalətli və azad seçki proseslərinin təmin edilməsi məqsədilə xüsusilə seçkilər dövründə Gürcüstanda demokratik mühitin monitorinqi və təşviqi üzrə işçi qrupun yaradılması nəzərdə tutulur.
İkitərəfli Münasibətlərin və Dəstəyin Gücləndirilməsi: Gürcüstanda mühüm demokratik irəliləyişin təsdiqlənməsindən sonra, aktda Gürcüstanla daha əlverişli ticarət sazişi üzrə danışıqların aparılması, viza rejiminin sadələşdirilməsi və Rusiyanın təcavüzünə qarşı mübarizə üçün təhlükəsizlik və müdafiə dəstəyi də daxil olmaqla, ABŞ-ın yardımı nəzərdə tutulub.
Co Vilsonun sözlərinə görə, “Dostluq Aktı” onların Gürcüstan xalqı qarşısında götürdükləri öhdəliklərə nə qədər ciddi yanaşdıqlarını göstərir. Helsinki Komissiyasına sədrlik edən konqresmen deyib: “Bu qanunvericilik Gürcüstanın demokratiyasına növbəti hücumların baha başa gəldiyini vurğulayır, həm də bizim ikitərəfli tərəfdaşlığımızı bərpa etmək öhdəliyimizi nümayiş etdirir”.
