NATO Parlament Assambleyası Bürosunun məlumatına görə, “xarici agentlər” haqqında rus qanununun qəbulu Gürcüstan demokratiyası üçün geriyə addımdır və NATO dəyərlərinə ziddir.
Əsas xəbərlər
Gürcüstan 25 il əvvəl, 1999-cu ildə NATO Parlament Assambleyasının iştirakçı üzvü olub. Assambleya Bürosunun yaydığı bəyanatda bildirilir ki, Gürcüstan NATO-ya üzv olmağın gürcü xalqının seçdiyi və konstitusiyada təsbit olunmuş yol olduğu nəzərə alınaraq namizəd ölkə kimi tanınıb.
“Lakin ümumi demokratik dəyərlər NATO alyansının əsasını təşkil edir və bu dəyərlərə hörmət NATO-ya üzvlük üçün zəruri şərtdir. “Xarici təsirin şəffaflığı” haqqında qanun Gürcüstanın demokratiyası üçün geriyə doğru bir addımdır və onun NATO və Avropa İttifaqı ilə bağlı istək və dəyərlərinə ziddir. Bu qanun layihəsi qanuna çevrilərsə, söz və birləşmək azadlığına ciddi ziyan vuracaq və Gürcüstanın fəal vətəndaş cəmiyyəti və media mənzərəsini sarsıdacaq.
Qanunu yenidən təqdim edib qəbul etməklə Gürcüstan hökuməti öz xalqına və beynəlxalq tərəfdaşlarına verdiyi vədi pozdu. Onlar dinc etirazlara qəbuledilməz zorakılıqla cavab verdilər və ən yaxın tərəfdaşlarının aydın və ardıcıl çağırışlarına məhəl qoymadılar.
Gürcüstan yol ayrıcındadır. Əgər hökumət və parlament Gürcüstanın gələcəkdə NATO-ya üzv olmağa hazır olduğunu göstərmək istəyirsə, demokratik islahatlar və demokratik konsolidasiya yoluna qayıtmalıdırlar. Gürcüstan prezidentinin veto qoyduğu bu qanunu indi geri götürmək lazımdır.
Gürcü xalqı dəfələrlə nümayiş etdirib ki, onlar demokratik Gürcüstan istəyirlər - Avropa İttifaqında və NATO-da. Onlar bu qanun layihəsinə cəsarətlə etiraz etdilər. Biz onları və onların istəklərini dəstəkləməyə davam edəcəyik. Biz bu güclü mesajları çatdırmaq, eyni zamanda Gürcüstanın Avropa və Avro-Atlantik yoluna tam dəstəyimizi təklif etmək üçün NATO Parlament Assambleyasında Gürcüstan nümayəndə heyəti ilə dialoqu davam etdirəcəyik”, - bəyanatda deyilir.
Gürcüstan parlamenti “xarici agentlər haqqında” rus qanununu mayın 14-də keçirilən plenar iclasda üçüncü, yekun oxunuşda qəbul edib. 84 deputat onu dəstəkləyib, 30 deputat isə əleyhinə çıxıb. Hakimiyyət beynəlxalq tərəfdaşların, o cümlədən NATO-nun baş katibi Yan Stoltenberqin mövqeyini və ölkədə davam edən etiraz aksiyalarının qanunun qeyd-şərtsiz geri götürülməsi tələbini nəzərə almayıb. Mayın 18-də prezident Salome Zurabişvili qanuna veto qoyub, lakin “Gürcü Arzusu” mayın 27-28-də onu aşmağı planlaşdırır.
