Şengen vizası olan Rusiya vətəndaşları oktyabrın 25-dən etibarən Çexiyaya turist, idman və ya mədəni məqsədlərlə daxil ola bilməyəcəklər - Çexiya hökuməti qərarı dünən qəbul edib.
Əsas xəbərlər
Xarici işlər naziri Yan Lipavskinin sözlərinə görə, əlavə viza məhdudiyyətlərinin tətbiqi Rusiya tərəfindən Ukraynada vəziyyətin gərginləşməsini əks etdirir.
“Rusiya raketləri Ukraynada uşaq meydançalarına və işləməyə gedən insanlara düşməzdən əvvəl hər gün 200-ə yaxın Rusiya Federasiyasının vətəndaşı beynəlxalq hava limanı vasitəsilə Çexiyaya daxil olur. Buna görə də biz Şengen zonasının xarici sərhədlərindən, yəni bizim beynəlxalq hava limanımız vasitəsilə turizm, idman və ya mədəni məqsədlərlə Çexiyaya daxil olan Rusiya vətəndaşlarının ölkəyə girişindən imtina etməyə razılaşdıq.
Bu tədbir Aİ-yə üzv olan hər hansı dövlət tərəfindən verilmiş etibarlı Şengen vizası olan səyahətçilərə şamil ediləcək”, - deyə xarici işlər naziri bildirib.
Bir neçə həftə əvvəl Rusiya ilə həmsərhəd olan Avropa İttifaqına üzv ölkələr - Latviya, Litva, Estoniya, Polşa və Finlandiya sərhədlərini rusiyalı turistlər üçün bağlayıb. Bundan başqa, Avropa İttifaqı ilə Rusiya arasında sadələşdirilmiş viza rejiminə dair saziş dayandırılıb. Avropa Şurasının bu qərarı nəticəsində sentyabrın 12-dən Rusiya vətəndaşları üçün viza rüsumu 80 avroya yüksəlib və viza almaq üçün əlavə sənədlərin təqdim edilməsi zərurəti yaranıb. Rusiya vətəndaşları üçün Şengen vizalarının alınmasının daha uzun sürəcəyi ilə yanaşı, çoxsaylı vizanın verilməsi də məhdudlaşdırılacaq. Rusiyanın Ukraynaya təcavüzündən sonra Çexiya viza verməkdən imtina edən ilk Aİ ölkəsi olub. Çexiya hökuməti bu qərarı fevralın 25-də verib və hələ də qüvvədədir.
Şengen zonasına daxil olduqdan sonra Aİ üzvü olmayan ölkələrin vətəndaşları daxili sərhədlərdə pasport nəzarətindən keçmədən onun daxilində sərbəst hərəkət edə bilərlər. Bununla belə, hər bir Aİ ölkəsi öz xarici sərhədləri vasitəsilə Aİ-yə girişə müstəqil şəkildə nəzarət edir.
