Avropa Komissiyasının prezidenti Ursula fon der Leyenin sözlərinə görə, Rusiya heç bir səbəb olmadan Ukraynaya qarşı “təhrik olunmamış və əsassız” müharibəyə başlayıb. O, bu barədə Bratislavada keçirilən Qlobal Təhlükəsizlik Forumunda (GLOBSEC) çıxışı zamanı bildirib.
Əsas xəbərlər
Von der Leyen qeyd edib ki, Ukraynaya qarşı müharibə Avropa üçün həlledici məqamdır.
“Tariximizdə ilk dəfə olaraq bir ölkə Avropa ailəsinin üzvü olmaq istəyinə görə hücuma məruz qalır. Bu, Ukraynanın suveren qərarı və xalqının birliyimizin dəyərlərini qəbul etmək üçün açıq şəkildə ifadə edilmiş iradəsidir. Bununla onlar bizim azadlığımız və dəyərlərimiz, demokratiya və qanunun aliliyi, söz azadlığı və öz müqəddəratını təyin etmək azadlığı uğrunda mübarizə aparırlar. Ukrayna bunun üçün mübarizə aparır və prezident Putin də bunu söndürməyə çalışır”, - Avropa Komissiyasının sədri bildirib.
Onun sözlərinə görə, Rusiya prezidenti Avropanın İkinci Dünya Müharibəsindən sonra və daha sonra dəmir pərdənin süqutundan sonra birlikdə qurduğu sülhü məhv etməyə çalışır:
“Bu müharibənin mənşəyi budur, xanımlar və cənablar. Burada, “GLOBSEC”də bu müharibənin səbəblərini müzakirə etdiyinizi öyrəndim. Ona görə də açıq deyim - bu təhrik olunmamış və əsassız müharibəyə Rusiya başladı. O, Ukraynaya onu xəritədən silmək üçün, heç bir səbəb olmadan hücum edib və Ukraynanı müstəqil ölkə kimi qəbul etməkdən imtina edir.
Ancaq Ukraynanın döyüşmək və azad olmaq iradəsi dünyanı heyrətləndirdi. Onlar öz yerlərinin harada olduğunu dəqiq bilirlər. Ukrayna xalqı uzun illərdir ki, Ukraynanın Aİ-yə doğru gedişinin memarları olub və onlar öz cəsarətlərini və qətiyyətlərini dəfələrlə sübut ediblər. Biz heç vaxt Ukrayna xalqının fədakarlığı və şücaətini müqayisə edə bilmərik, lakin biz onların yanında möhkəm dayana bilərik və dayanmalıyıq”.
Mayın 30-daki Qlobal Təhlükəsizlik Forumunda tematik müzakirədə iştirak edən Gürcüstanın baş naziri də olub. İrakli Ğaribaşvilidən Rusiyanın 2022-ci ildə Ukrayna ilə müharibəyə başlamasının səbəbini soruşduqda o, belə cavab verib: “Səbəblərdən biri Ukraynanın NATO-ya üzv olmaq iradəsi və niyyəti idi və buna görə də bunun nəticəsini görürük”. Ğaribaşvili ölkə daxilində və xaricində beynəlxalq tərəfdaşlar tərəfindən tənqid edilib. Misal üçün, amerikalı general və ABŞ-ın Avropadakı qoşunlarının keçmiş komandanı Ben Hodcesin sözlərinə görə, Gürcüstanın baş naziri “mahiyyətcə bildirib ki, Gürcüstanın xarici siyasəti artıq NATO-ya üzvlüyü ehtiva etmir”.
