Ukrayna silahlı qüvvələri Rusiyanın Kursk vilayətinin 28 yaşayış məntəqəsinə nəzarət edir. Bu barədə Rusiya prezidenti Vladimir Putinlə görüşü zamanı rayonun qubernatoru vəzifəsini icra edən Aleksey Smirnov bildirib. Smirnov Kurskdakı hazırkı vəziyyəti “çətin” adlandırıb.
Əsas xəbərlər
“Kursk vilayətinin ərazisinə nüfuz etmə dərinliyi 12 kilometr, eni 40 kilometrdir. Bu zonada 28 yaşayış məntəqəsi var ki, bu da 2 minə yaxın insan deməkdir və onların taleyi bizə məlum deyil”, - Smirnov bildirib.
Aleksey Smirnovun sözlərinə görə, Ukraynanın Kursk vilayətinə hücumu nəticəsində 12 nəfər ölüb, 10-u uşaq olmaqla 121 nəfər yaralanıb. Bu vaxta qədər rayonun sərhədyanı ərazilərini 121 minə yaxın sakin tərk edib. Qubernator 180 min insanın təxliyə olunmalı olduğunu qeyd edib.
Smirnov həmçinin bildirib ki, Kursk vilayətində dəqiq cəbhə xəttinin olmaması Ukrayna hərbçilərinin yerini müəyyənləşdirməyi çətinləşdirir.
“Bizim üçün problem odur ki, aydın cəbhə xətti yoxdur, döyüş hissələrinin hara yerləşdirildiyi məlum deyil. Hər an düşmənin harada olduğunu bilmək çox vacibdir”, - qubernator Putinə deyib.
Ukrayna silahlı qüvvələri avqustun 6-da səhər saatlarında Kursk istiqamətində hücuma başlayıb. Vladimir Putinin sözlərinə görə, hazırda Rusiya Müdafiə Nazirliyinin əsas vəzifəsi düşməni Rusiya ərazilərindən qovmaqdır.
