Tbilisinin Kazbeqi prospektində baş verən yol qəzası nəticəsində 19 yaşlı Revi Demetraşvili dünyasını dəyişib. “Mtavari Arxi” və “Formula” teleşirkətlərinin məlumatına görə, patrul polisinin ekipajı sürücünün yolunu bağlayıb və o, polis maşını ilə toqquşması nəticəsində həlak olub. Faktla bağlı prokurorluq istintaqa başlayıb.
Əsas xəbərlər
Yol-nəqliyyat hadisəsi səhər saatlarında baş verib. Məlumata görə, yol hərəkəti qaydalarını pozan motosiklet sürücüsü patrulun çağırışına tabe olmayıb və dayanmayıb, bundan sonra patrul onu təqib edib. “Mtavari Arxi”nin məlumatına görə, motosiklet sürücüsünün yolunu Xutsişvili küçəsindən gələn ekipaj bağlayıb.
Televiziya şirkətlərinin əldə etdiyi videogörüntülərdə polis patrul maşınının orta hissəsindən zədələndiyi görünür. Daxili İşlər Nazirliyi hadisə ilə bağlı açıqlama verməyib.
Faktla bağlı Prokurorluq Cinayət Məcəlləsinin sürücünün yol hərəkəti təhlükəsizliyi və ya istismar qaydalarını pozması insan ölümünə səbəb olmanı nəzərdə tutan 276-cı maddəsinin 6-cı hissəsi ilə istintaq aparır.
Daxili İşlər Nazirliyi Kazbeqi prospektində baş verənləri telefonla lentə alan vətəndaşı inzibati qaydada həbs edib. O, polis əməkdaşlarını şifahi təhqir etməkdə ittiham olunur.
