2023-cü ildən tibb bacılarının minimum aylıq əmək haqqı 792 lari, həkimlərinki isə 1260 lari olacaq. Səhiyyə naziri Zurab Azaraşvilinin sözlərinə görə, klinikalar bu maaşı artıra bilər.
Əsas xəbərlər
Oxucunun seçimi
„Bizdə çox sayda həkim və tibb bacısı var ki, təəssüf ki, çox aşağı maaş alırdılar. Bir neçə aydır ki, biz bunu dövlət klinikalarında pilot layihə kimi hazırlayır, həm də prosesi izləyirdik və hesab edirik ki, dövlətin universal səhiyyədən ödədiyi tibbi xidmətlərə görə ödənişlərlə həkim və tibb bacılarının minimum aylıq əməkhaqqının müəyyən edilməsi məqsədəuyğundur.
Vurğulayıram ki, bu minimum məbləğdir və heç bir halda sabit əmək haqqı deyil. Təbii ki, bundan da yüksək maaşın təyin edilməsi mümkündür. Tibb bacıları üçün minimum əmək haqqı 792 lari, həkimlər üçün 1260 lari olacaq.
Yenə vurğulayıram, bu, minimum əmək haqqıdır, çünki ilk vaxtlar biz bunu elan edəndə belə fikirlər səslənirdi ki, biz sabit əmək haqqı müəyyən etmişik”, - bunu İşğal olunmuş Ərazilərdən olan Məcburi Köçkünlər, Əmək, Səhiyyə və Sosial Müdafiə Naziri Zurab Azaraşvili deyib.
Hökumətin bu gün keçirilən iclasında qərar qəbul edilib ki, 2023-cü ildən dövlət tərəfindən dərman vasitələrinin qiymətinin maksimum həddi müəyyən ediləcək və ondan artıq dərman vasitələrinin satışı qadağan ediləcək. Yanvarın 1-dən dəyişiklik 1100-dən çox xroniki və onkoloji dərmana şamil olunacaq. Qiymətlər topdan və pərakəndə satış səviyyəsində tənzimlənəcək.
“Maksimum topdansatış qiyməti götürəcəyik və bunun əsasında apteklər artıq marja əlavə edə biləcəklər. Marjalar topdansatış qiymətindən asılı olaraq dəyişir və 15 %-dən 40 %-ə qədər müəyyən edilir. Dərmanın qiyməti nə qədər baha olsa, marja bir o qədər azalır və pərakəndə satış şirkətləri qiyməti 100 laridən yuxarı olan dərmana maksimum 20 lari əlavə edə biləcəklər. İstifadəçinin marağı ilə yanaşı sektorun marağını da nəzərə aldıq. Buna görə də biz iki səviyyəli metodologiya hazırlamışıq ki, bu da bir tərəfdən ölkədə müxtəlif molekulların çatışmazlığını sığortalayacaq, həm də ağlabatan, kommersiya maraqlarını qoruyacaq", - deyə səhiyyə naziri bildirib.
Zurab Azaraşvilinin sözlərinə görə, dövlət 2026-cı ilə qədər əhali üçün xroniki dərmanların dəyərinin ən azı 92 %-ni ödəməyi planlaşdırır.
