აფხაზეთში ე.წ. პრეზიდენტობის კანდიდატებად დაასახელეს ოლეგ ბარციცი და ადგურ არძინბა

გამოცემა „აფსნიპრესი“ წერს, რომ საინიციატივო ჯგუფის წევრებს რეგისტრაციის მოწმობები და ხელმოწერის ფურცლები გადაეცათ. მათ უნდა სულ მცირე 2000 და არაუმეტეს 2500 ამომრჩევლის ხელმოწერა უნდა შეაგროვონ.

ოლეგ ბარციცი წლების განმავლობაში რუსეთში დე ფაქტო აფხაზეთის სავაჭრო წარმომადგენელი იყო. ის თანამდებობიდან მიმდინარე წლის ივლისში გაათავისუფლეს. 2019 წელს ბარციცი მაშინდელი ე.წ. პრეზიდენტობის კანდიდატის, ოლეგ არშბას გუნდში იყო და ვიცე-პრეზიდენტობის კანდიდატად სახელდებოდა, თუმცა, არშბა პირველივე ტურში დამარცხდა.

რაც შეეხება ადგურ არძინბას, ის „აფხაზეთის სახალხო მოძრაობის“ ლიდერია. 2015-2020 წლებში კი დე ფაქტო ეკონომიკის მინისტრისა და ვიცე-პრემიერის თანამდებობებს იკავებდა. არძინბა აქტიურად იყო ჩართული მიმდინარე წლის ნოემბრის საპროტესტო გამოსვლებში, რის შედეგადაც ე.წ. პარლამენტმა ვერ შეძლო რუსეთსა და აფხაზეთს შორის დადებული საინვესტიციო შეთანხმების რატიფიცირება, ასლან ბჟანია კი პრეზიდენტის თანამდებობიდან გადადგა. ადგურ არძინბა აცხადებდა, რომ პროტესტი რუსეთის წინააღმდეგ არ იყო მიმართული.

ე.წ. ვადამდელ საპრეზიდენტო არჩევნებში, რომელიც 15 თებერვალს უნდა გაიმართოს, მონაწილეობას მიიღებს  ბადრა გუნბაც, რომელსაც ასლან ბჟანიას გუნდი უჭერს მხარს და ამჟამად ე.წ. პრეზიდენტის მოვალეობას ასრულებს. თავად ბჟანიამ საკუთარი კანდიდატურის დაყენებაზე უარი თქვა.

ასევე ცნობილი ხდება, რომ კანდიდატს წარადგენს „აფხაზეთის სახალხო პარტიაც“. შამილ აძინბას პრეზიდენტობის კანდიდატად ოფიციალურად 26 დეკემბერს, პარტიის ყრილობაზე დაასახელებენ.

აფხაზეთის ე.წ. ცესკო არჩევნებისთვის საინიციატივო ჯგუფებისა და პარტიების რეგისტრაცია 6 იანვარს დაასრულებს.