არჩევნებში გამარჯვების შემდეგ მაია სანდუმ ქართველ ხალხს მიმართა

„გუშინ მოლდოველებმა გადადგეს გადამწყვეტი ნაბიჯი ჩვენს ევროპულ გზაზე, მაგრამ ბრძოლა დემოკრატიისთვის მოლდოვაში და ჩვენს რეგიონში გრძელდება. ქართველ ხალხს: აღფრთოვანებული ვარ თქვენი გამძლეობითა და მონდომებით, ააშენოთ თავისუფალი, ევროპული მომავალი. მტკიცედ დადექით - მოლდოვა თქვენთანაა“, - დაწერა სანდუ პლატფორმა X-ზე.

მანამდე, მაია სანდუს გამარჯვება მიულოცა საქართველოს პრეზიდენტმა, სიტყვებით - „თქვენი გამარჯვება ჩვენი გამარჯვებაა“. სალომე ზურაბიშვილმა X-ზე დაწერა, რომ მოლდოვის არჩევნები საქართველოს მოპარული არჩევნების საუკეთესო „მტკიცებულებაა“.

„რუსეთის მსგავსი ჩარევისა და მასიური გაყალბების მიუხედავად, მოლდოვა დიასპორის 300 000 ამომრჩეველმა გადაარჩინა... ჩვენს 1 000 000-იან ძლიერ დიასპორას ხელი შეეშალა და მხოლოდ 34 000-ს „დართეს ნება“, ხმა მიეცათ“, - განაცხადა ზურაბიშვილმა.

მოლდოვის ცენტრალური საარჩევნო კომისიის მონაცემებით, ხმების 99.86%-ის დათვლის შემდეგ, მოლდოვის საპრეზიდენტო არჩევნების მეორე ტურში მოქმედი პრეზიდენტი მაია სანდუ იმარჯვებს. მას ხმების 55.3% აქვს, ხოლო მის კონკურენტს, პრორუსული პარტიის წარმომადგენელსა და ყოფილ გენერალურ პროკურორს, ალექსანდრ სტოიანოღლოს - 44.7%. მოქმედმა პროევროპელმა პრეზიდენტმა უპირატესობა საზღვარგარეთ მცხოვრები მოლდოველების ხმების წყალობით მოიპოვა. ეროვნული უსაფრთხოების საკითხებში მოლდოვის პრეზიდენტის მრჩეველმა, სტანისლავ სეკრიერუმ კენჭისყრის დღეს რუსეთის მხრიდან საარჩევნო პროცესში „მასობრივი ჩარევის“ შესახებ განაცხადა.