აშშ მზად არის ქუთაისის აეროპორტს აგრო პროდუქტების საექსპორტო ჰაბად გადაქცევაში დაეხმაროს

„განსაკუთრებით აღსანიშნავია, ის დიდი სარგებელი, რომელსაც ის დასავლეთ საქართველოს ფერმერებს მოუტანს, თუ სოფლის მეურნეობის პროდუქტის საექსპორტო ჰაბადაც გადაიქცევა. შეერთებული შტატები მზად არის ამ მიმართულებით დაეხმაროს ქუთაისის აეროპორტს“, - ნათქვამია საელჩოს მიერ დღეს გავრცელებულ განცხადებაში.

გუშინ, 31 ივლისს, ქუთაისის საერთაშორისო აეროპორტში ელჩი კელი დეგნანი იმყოფებოდა და ამერიკული სწრაფი მომსახურების რესტორანი Subway გახსნა. აეროპორტის პოტენციალზე ყურადღება ელჩმაც გაამახვილა.

„ეს აეროპორტი მართლაც გახდა საერთაშორისო ჰაბი, რომელმაც მილიონობით ტურისტი ჩამოიყვანა საქართველოში ამ ულამაზესი ქვეყნის აღმოსაჩენად. საბოლოოდ, ვიმედოვნებთ, რომ ქუთაისის აეროპორტი გახდება ტრანსპორტირების ჰაბი ისეთი სასოფლო-სამეურნეო პროდუქტებისთვის როგორებიცაა მოცვი, ჟოლო და ამ რეგიონში მოყვანილი სხვა უგემრიელესი პროდუქტები“, - თქვა კელი დეგნანმა.

როგორც ელჩმა აღნიშნა, აშშ-ის საელჩომ და USAID-მა ითანამშრომლეს საქართველოს აეროპორტების გაერთიანებასთან არა მხოლოდ ქუთაისის აეროპორტში მომუშავე თანამშრომლების კვალიფიკაციის ასამაღლებლად, არამედ ბრენდის მარკეტინგისთვის, „რათა ხალხმა ქუთაისის საერთაშორისო აეროპორტის შესახებ შეიტყოს და ქუთაისის მეშვეობით, მთელი საქართველო გაიცნოს“. კელი დეგნანის განცხადებით, საელჩო ასევე განიხილავს ოპერაციების გაფართოებას ისეთი მიმართულებებით, როგორებიცაა თვითმფრინავების ტექნიკური მომსახურება და რემონტი.