აზერბაიჯანელი ჟურნალისტი, ვებ-გვერდ Azel.TV-ის რედაქტორი აფგან სადიგოვი ამბობს, რომ 17 ივლისს, ქართველმა მესაზღვრეებმა თბილისიდან თურქეთის დედაქალაქში გაფრენის უფლება არ მისცეს და უთხრეს, რომ მხოლოდ აზერბაიჯანში დაბრუნება შეუძლია. სადიგოვი მომხდარს აზერბაიჯანის ხელისუფლების მიმართ კრიტიკას უკავშირებს და მიიჩნევს, რომ მისთვის სხვა ქვეყანაში გამგზავრების აკრძალვის ბრძანება ბაქოდან მოდის.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
აფგან სადიგოვი ანკარაში ცოლთან და ორ ქალიშვილთან ერთად მიემგზავრებოდა.
„თბილისის აეროპორტში საპასპორტო კონტროლზე გამიჩერეს. მითხრეს, რომ ჩემს პასპორტს პრობლემა ჰქონდა, რომ აზერბაიჯანში დაბრუნების გარდა, ვერცერთ ქვეყანაში ვერ წავალ. არ დააკონკრეტეს, ვინ ამიკრძალა მესამე ქვეყნებში შესვლა და შემომთავაზეს, რომ განმარტებისთვის საქართველოს შინაგან საქმეთა სამინისტროს მივმართო.
ეს განპირობებულია ბოლო დროს ჩემი კრიტიკული პოსტებითა და ვიდეოებით. ამჟამად ჩემს წინააღმდეგ სისხლის სამართლის საქმე არ არის აღძრული, მაგრამ ვიცი, რომ როგორც კი აზერბაიჯანში დავბრუნდები, სხვა კრიტიკოსი ჟურნალისტების მსგავსად დამაპატიმრებენ“, - ამბობს სადიგოვი.
ჟურნალისტი საქართველოში 2023 წლის 24 დეკემბრიდან ცხოვრობს. როგორც ის ამბობს, აქ სამკურნალოდ ჩამოვიდა, თუმცა მის მიმართ მუქარისა და აზერბაიჯანელი ჟურნალისტების დაკავების ახალი ტალღის დაწყების გამო, სამშობლოში აღარ დაბრუნებულა.
აფგან სადიგოვი და მისი ოჯახი საქართველოში თავს უსაფრთხოდ ვერ გრძნობენ. სწორედ ამიტომ სურთ ქვეყნის დატოვება.
„დიქტატორი ილჰამ ალიევი და საქართველოს ხელისუფლება, რომელიც ახორციელებს მის რეპრესიულ, პოლიტიკურ ბრძანებებს, პირდაპირ არიან პასუხისმგებელი ნებისმიერ ინციდენტზე, რომელიც მე დამემართება საქართველოში“, - დაწერა ჟურნალისტმა Facebook-ში.
აზერბაიჯანის ხელისუფლებამ აფგან სადიგოვი 2020 წლის მაისში გამოძალვის ბრალდებით დააკავა. იმავე წლის ნოემბერში მას 7 წლით თავისუფლების აღკვეთა მიუსაჯეს. სადიგოვი ბრალდებას უარყოფდა და პროტესტის ნიშნად ციხეში შიმშილობაც ჰქონდა გამოცხადებული. ადგილობრივმა უფლებადამცველებმა ის პოლიტპატიმარად აღიარეს. სადიგოვი ერთ-ერთი იყო იმ მსჯავრდებულებს შორის, რომელიც 2022 წლის მაისის ბოლოს პრეზიდენტმა ილჰამ ალიევმა შეიწყალა.
