ბელგიის პოლიციამ ტრანსგენდერი ქალის, ლიზა ქისტაურის გარდაცვალება დაადასტურა

მომხდარის შესახებ დამატებითი დეტალები ჯერ უცნობია. ტელეკომპანია „ფორმულას“ ბელგიის პროკურატურაში განუცხადეს, რომ ტრანსგენდერი ქალის ცხედარი სამართალდამცველებმა 2 იანვარს იპოვეს, რის შემდეგაც მას ექსპერტიზა ჩაუტარეს, რამაც დანაშაულის ნიშნები გამორიცხა.

„გასულ ორშაბათს, ანტვერპენში, ერთ-ერთ ბინაში 26 წლის ქალის ცხედარი იპოვეს. დაუყოვნებლივ დაიწყო გამოძიება და ჩატარდა აუტოფსია. ამან აჩვენა, რომ არ აღინიშნება დანაშაულის ნიშნები“, - ციტირებს „ფორმულა“ პროკურატურის კომენტარს.

ქართულმა მედიასაშუალებებმა 5 იანვარს გაავრცელეს ინფორმაცია, რომ ლიზა ქისტაური მოკლული იყო. ტელეკომპანია „პირველი“ წყაროს მითითების გარეშე იუწყებოდა, რომ „26 დეკემბრის შემდეგ ქისტაური და მისი პარტნიორი გაუჩინარდნენ ისე, რომ მათი ადგილსამყოფელი არავინ იცოდა. დედას კი, რომელიც საქართველოში დროებით იყო ჩამოსული, შვილის ნაწამები ცხედრის ფოტოები ამოსაცნობად გამოუგზავნეს. ტელევიზიის ინფორმაციით, ახალგაზრდა ტრანსგენდერი სასტიკად იყო ნაცემი და მის ცხედარს უამრავი დაზიანება აღენიშნებოდა. 

სატელევიზიო მუსიკალურ კონკურსის, „X ფაქტორის“ მონაწილემ და პოპულარულმა ბლოგერმა გიორგი ქისტაურმა, რომელიც სოციალური ქსელებით ცნობილი დაახლოებით 12 წლის წინ გახდა, 2018 წელს განაცხადა, რომ ტრანგენდერი ქალი იყო. ბოლო წლებში ის ბელგიაში ცხოვრობდა.