სამხედრო პოლიცია საფრენი აპარატის მართვის ან ექსპლუატაციის წესის დარღვევის მუხლით იძიებს ბოლნისის მუნიციპალიტეტში სამხედრო თვითმფრინავის, „სუ 25“-ის ჩამოვარდნის ფაქტს, რასაც თავდაცვის ძალების ავიაციისა და საჰაერო სარდლობის პილოტი, ვიცე-პოლკოვნიკი კახაბერ ზურაბაშვილი ემსხვერპლა. თავდაცვის სამინისტროში აცხადებენ, რომ წინასწარი მოკვლევით, საფრენი აპარატი გაფრენამდე „სრულად იყო შემოწმებული“.
ახალი ამბები
მკითხველის რჩეული
- 1 მოსამართლემ გორში დაკავებული აქტივისტის საქმეზე ყველა საგამოძიებო მოქმედება უკანონოდ ცნო
- 2 14 წლის აითაჯ შახმაროვას მკვლელობაში ბრალდებულ ე.წ. ქმარს უვადო პატიმრობა მიუსაჯეს
- 3 რუსეთმა უკრაინაში მებრძოლ რუსუდან ივანეიშვილს პატიმრობა დაუსწრებლად მიუსაჯა
- 4 კაშია: მსურს მადლობა გადავუხადო ბიძინა ივანიშვილს ჩვენი შრომის დაფასებისთვის
- 5 მასობრივად წაშალეს „მთის ამბების“ კრიტიკული მასალები ფეისბუკიდან
- 6 7 წლის წინ სიღნაღის პოლიციაში მოქალაქის ცემისთვის ყოფილ პოლიციელს ბრალი წარუდგინეს
„ტრაგიკული ინციდენტის სრულყოფილი შესწავლის მიზნით, შესაბამისი სამსახურების მიერ ყველა საჭირო პროცედურა ტარდება. ამ ეტაპზე იდენტიფიცირებულია საფრენი აპარატის ნაწილები და ნაპოვნია შავი ყუთი. დაღუპული მფრინავის ცხედარი გადასვენებულია პროზექტურაში.
მომხდართან დაკავშირებით საქმე აღძრულია 401-ე მუხლით, სამხედრო-საჰაერო ხომალდის ფრენისას უსაფრთხოების წესების დარღვევის ფაქტზე. გენერალური პროკურატურის საპროცესო ზედამხედველობით, გამოძიებას აწარმოებს სამხედრო პოლიცია.
წინასწარი მოკვლევით, საფრენი აპარატი გაფრენამდე სრულად იყო შემოწმებული ტექნიკური დოკუმენტაციის მოთხოვნათა შესაბამისად. ასევე, ჩატარებული იყო წინასაფრენოსნო მომზადება და დაცული იყო რეგლამენტით გათვალისწინებული ყველა პროცედურ “, - ნათქვამია თავდაცვის სამინისტროს მიერ დღეს, 3 ივლისს გავრცელებულ განცხადებაში.
სისხლის სამართლის კოდექსის 401-ე მუხლი გულისხმობს სამხედრო საფრენი აპარატის მართვის ან ფრენისათვის მზადების წესის, ანდა მისი ექსპლუატაციის წესის დარღვევას, რამაც ადამიანის სიცოცხლის მოსპობა ან სხვა მძიმე შედეგი გამოიწვია. დანაშაული ისჯება თავისუფლების აღკვეთით ვადით ხუთიდან ათ წლამდე.
ბოლნისის მუნიციპალიტეტში, სოფელ დისველის მიმდებარედ, მინდორში, თავდაცვის ძალების კუთვნილი „სუ-25“ ტიპის თვითმფრინავი 2 ივლისს, დაახლოებით 13:00 საათზე ჩამოვარდა. მომხდარიდან მალევე, რამდენიმე ადგილობრივმა „საქართველოს ამბებს“ უთხრა, რომ თვითმფრინავს ცეცხლი ჰაერში გაუჩნდა. ავიაკატასტროფა სამხედრო ბაზის სიახლოვეს მოხდა.
ათი თვის წინ, 2023 წლის აგვისტოში, საქართველოს თავდაცვის სამინისტრო აცხადებდა, რომ 7 ერთეული „სუ-25“-ის ტიპის თვითმფრინავი განაახლეს. საგამოცდო ფრენებში ვიცე-პოლკოვნიკი კახაბერ ზურაბაშვილი და მაშინდელი თავდაცვის მინისტრი, ჯუანშერ ბურჭულაძეც მონაწილეობდნენ. „სუ-25“-ების სარემონტო სამუშაოები სახელმწიფო სამხედრო სამეცნიერო-ტექნიკურმა ცენტრმა „ტელტამ“ და „თბილავიამშენმა“ ჩაატარეს.
