ბულგარეთში, ბურგასის ერთ-ერთ პორტში ბათუმიდან გემით შესულ ტრაილერში დაახლოებით 38 მილიონი დოლარის ღირებულების 436 კილოგრამი ჰეროინი აღმოჩინეს. 434 ცალ პოლიეთილენის შეფუთვაში განაწილებული ნარკოტიკული ნივთიერება ოფიციალურად დეკლარირებული ტვირთის შიგნით იყო დამალული.
ახალი ამბები
მკითხველის რჩეული
- 1 „ცოლად შერთვის მიზნით გაიტაცა და სექსუალურად იძალადა“ - კახეთის პოლიციამ 5 პირი დააკავა
- 2 სამტრედიაში ნიკა მელიას თავს დაესხნენ
- 3 კობახიძემ დააკონკრეტა რომელი ოპოზიციური პარტიების აკრძალვას გეგმავს „ქართული ოცნება“
- 4 შოვის სტიქიაზე ახალი კვლევის გამოქვეყნების შემდეგ ლაშა სუხიშვილი გამოკითხვაზე დაიბარეს
- 5 გაეროში რუსეთის წარმომადგენელმა აგვისტოს ომზე „ქართული ოცნების“ განცხადება გაიმეორა
- 6 მწვერვალ შხელდაზე დაღუპული მთამსვლელის, არჩილ ბადრიაშვილის ცხედარი იპოვეს
ბულგარეთის პროკურატურის ინფორმაციით, ტრაილერი ივლისის ბოლოს, სახმელეთო გზით, ყირგიზეთიდან საქართველოში შევიდა, რის შემდეგაც ბათუმის პორტიდან ბულგარეთში გადაიტანეს. ბულგარეთიდან ის საბერძნეთში, ალექსანდროპოლისში უნდა ჩასულიყო.
„საუბარია ჰეროინის კონტრაბანდაზე ეგრეთ წოდებული კავკასიური მარშრუტით“, - განაცხადა ნარკოტიკების უკანონო ბრუნვასთან ბრძოლის განყოფილების ხელმძღვანელმა, სტეფან ბაკალოვმა.
ნარკოტიკული საშუალება მას შემდეგ იპოვეს, რაც მებაჟეებმა ტრაილერი პორტში უჩვეულოდ დიდხანს დგომის შემდეგ შეამოწმეს. დოკუმენტების მიხედვით, მას ოთხი კაბელის გამყვანი მანქანა გადაჰქონდა, თუმცა რენტგენით შემოწმების შედეგად მანქანებში აღმოაჩინეს ღრუები, რომლებშიც ნარკოტიკები იყო მოთავსებული.
საქმესთან დაკავშირებით პროკურატურას არავინ დაუკავებია. ადგილობრივი მედიის ცნობით, ნარკოტიკებით ვაჭრობა ბულგარეთში 15-დან 20 წლამდე პატიმრობით ისჯება.
ბულგარეთის პროკურატურის მიერ გავრცელებულ ინფორმაციას საქართველოს სამართალდაცავი უწყებები არ გამოხმაურებიან.
