ღარიბაშვილმა ერდოღანს არჩევნების პირველ ტურში მიღწეული წარმატება მიულოცა

საქართველოს მთავრობის ადმინისტრაციის ინფორმაციით, ირაკლი ღარიბაშვილი თურქეთის პრეზიდენტს ტელეფონით ესაუბრა და მეორე ტურში წარმატება უსურვა.

„პრემიერ-მინისტრმა ხაზი გაუსვა პრეზიდენტ ერდოღანის პერსონალურ როლს როგორც თურქეთ-საქართველოს სტრატეგიული პარტნიორობის განმტკიცებაში, ასევე რეგიონის მდგრად და სტაბილურ განვითარებაში იმ ერთობლივი, საერთაშორისო ხასიათის პროექტების მხარდაჭერით, რომელშიც თურქეთი და საქართველო არიან ჩართულნი“, - წერია მთავრობის ადმინისტრაციის მიერ გავრცელებულ განცხადებაში.

თურქეთში 14 მაისს გამართულ საპრეზიდენტო არჩევნებში რეჯეფ თაიფ ერდოღანმა, რომელსაც მესამე ვადით სურს პრეზიდენტის თანამდებობის დაკავება, ამომრჩეველთა ხმების 49.51% მიიღო და პირველვე ტურში გასამარჯვებლად საჭირო 50%-იანი ბარიერის გადალახვა ვერ შეძლო. არჩევნების მეორე ტური 28 მაისს გაიმართება. მოქმედი პრეზიდენტის კონკურენტი გაერთიანებული ოპოზიცისს კანდიდატი ქემალ ქილიჩდაროღლუა, რომელსაც პირველ ტურში ხმა ამომრჩეველთა 44.88%-მა მისცა.

საპრეზიდენტო არჩევნებთან ერთად, ქვეყანაში საპარლამენტო არჩევნებიც ჩატარდა. ცენტრალური საარჩევნო კომისტეტის წინასწარი შედეგების მიხედვით, „რესპუბლიკურმა ალიანსმა“, რომელსაც სათავეში ერდოღანის „სამართლიანობისა და განვითარების პარტია“ უდგას, ხმების 49% მიიღო, რაც დაახლოებით 322 მანდატია 600-წევრიან საკანონმდებლო ორგანოში. მეორე ადგილზე გადის ქილიჩდაროღლუს „სახალხო რესპუბლიკურ პარტიის“ ირგვლივ გაერთიანებული „სახალხო ალიანსი“, რომელსაც ხმათა 35% აქვს და დაახლოებით 212 მანდატს მიიღებს.

საქართველოში გახსნილ საარჩევნო უბნებზე საპრეზიდენტო და საპარლამენტო არჩევნები თურქეთის ოპოზიციამ მოიგო.