„იმედის“ სამეთვალყურეო საბჭო თავმჯდომარემ და სამმა წევრმა დატოვეს

ირაკლი რუხაძემ, გიორგი ბახტაძემ,  გიორგი კალანდარიშვილმა და დავით შონიამ საჯარო რეესტრს სამეთვალყურეო საბჭოს დატოვების შესახებ 25 თევერვალს მიმართეს. ისინი განაცხადების დაკმაყოფილებას დაჩქარებული წესით ითხოვდნენ. რუხაძე სამეთვალყურეო საბჭოს წევრი 2003 წლიდან იყო.

24 თებერვალს, დიდი ბრიტანეთის მთავრობამ ტელეკომპანიებს „იმედსა“ და „პოსტივის“ (POSTV), როგორც „რუსული დეზინფორმაციის გავრცელებაში ჩართულ“ ორგანიზაციებს, ფინანსური სანქციები დაუწესა. 

ტელევიზიების დასანქცირების საფუძვლად მითითებულია რუსეთის მიერ უკრაინაში სრულმასშტაბიანი შეჭრის შესახებ განზრახ შეცდომაში შემყვანი ინფორმაციის გავრცელება ძირითადად საქართველოში არსებულ აუდიტორიას შორის, რაც მხარს უჭერს ან ხელს უწყობს პოლიტიკას ან ქმედებას, რომელიც ახდენს უკრაინის დესტაბილიზაციას ან ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტს ან დამოუკიდებლობას.

ირაკლი რუხაძემ და მისმა ბიზნეს-პარტნიორებმა ბრიტანეთში რეგისტრირებული საინვესტიციო კომპანია „ჰანიველ პარტნერსს-დან“ ტელეკომპანია „იმედი“ და მის ჰოლდინგში შემავალი სხვა მედიასაშუალებები თებერვლის დასაწყისში გაასხვისეს. შპს „პრაიმ მედია გლობალმა“, ჰოლდინგის 100%-იანი წილი, სიმბოლურ ფასად - 1000 ლარად იყიდა. ნასყიდობის ხელშეკრულების შესაბამისად, ახალმა მფლობელმა 50% საკუთრებაში გადასცა მარიამ ლომიძეს (10%) და მის ოთხ მოადგილეს - ვასილ კალანდარიშვილს (10%), ირაკლი ჩიხლაძეს (10%), ნათია სონღულაშვილსა (10%) და მაია ჩიგოშვილს (10%).

ამ თემაზე:

კობახიძე: „იმედში“ და „პოსტივიში“ არცერთ ჟურნალისტს არ გაუუარესდება მდგომარეობა