„ქართული ოცნება“ თბილისის მერობის კანდიდატად კვლავ კახა კალაძეს წარადგენს

კახა კალაძე თბილისის მერად პირველად 2017 წელს აირჩიეს, როდესაც ხმათა 51% მიიღო. მეორედ მან ამ პოსტის დაკავება 2021 წელს შეძლო მას შემდეგ, რაც არჩევნების მეორე ტურში „ნაციონალური მოძრაობის“ კანდიდატ ნიკა მელიასთან ერთად გადავიდა და ხმათა 55.6% მოიპოვა.

„ქართულ ოცნების“ გაცხადებული მიზანი არჩევნების 64-ვე მუნიციპალიტეტში მოგებაა.

„ქართველი ხალხის მხარდაჭერით, ჩვენ მოვიგებთ მერის და საკრებულოს არჩევნებს 64-ვე მუნიციპალიტეტში, რათა არცერთ მუნიციპალიტეტში არცერთი დღით არ შეჩერდეს განვითარება და სრულად დავიცვათ საქართველოს თითოეული მხარის, თითოეული კუთხის ინტერესები“, - განაცხადა „ქართული ოცნების“ პრემიერ-მინისტრმა, ირაკლი კობახიძემ 7 მაისს.

ჯერჯერობით უცნობია, თუ ვინ იქნება თბილისის მერობის კანდიდატი ოპოზიციური პარტიებიდან, „გახარია საქართველოსთვის“ და „ლელო – ძლიერი საქართველო“. „ძლიერი საქართველოს“ ერთ-ერთმა ლიდერმა, ალეკო ელისაშვილმა განაცხადა, რომ ამის შესახებ ცნობილი 31 ივლისს გახდება.

4 ოქტომბრის არჩევნებში მონაწილეობის მიღებას არ აპირებენ „ერთიანი ნაციონალური მოძრაობა“, „სტრატეგია აღმაშენებელი“, „გირჩი - მეტი თავისუფლება“, „დროა“, „ახალი”, „ფედერალისტები“, „თავისუფლების მოედანი“, „ევროპული საქართველო“ და „ანა დოლიძე - ხალხისთვის“.

„ივანიშვილის კრიმინალური რეჟიმის მიერ შექმნილი განუკითხაობის და უსამართლობის დაკანონებაში მონაწილეობას არ მივიღებთ. ვაღიარებთ მხოლოდ თავისუფალ საპარლამენტო არჩევნებს“, - აცხადებს 8 ოპოზიციური პარტია.

„სოციალური კვლევისა და ანალიზის ინსტიტუტის“ ბოლო კვლევის მიხედვით, თბილისში „ქართული ოცნების“ და მეინსტრიმული ოპოზიცური პარტიების რეიტინგი, ივნისის მონაცემებით, ასეთია:

• „ქართული ოცნება“ - 23%;
• „კოალიცია ცვლილებისთვის“ - 21%;
• „ერთიანობა - ენმ“ - 16.5%;
• „ლელო - ძლიერი საქართველო“ - 10.6%;
• „გახარია - საქართველოსთვის“ - 5.7%.

ამავე კვლევის შედეგების მიხედვით, თბილისის მოსახლეობაში ოპოზიციის მხრიდან ადგილობრივი არჩევნების ბოიკოტს ან მასში მხოლოდ ვადამდელი საპარლამენტო არჩევნების დათქმით მონაწილეობას უფრო მეტი უჭერს მხარს (47%), ვიდრე უპირობო მონაწილეობას (41%).

აღნიშნული კვლევა ეხება ადგილობრივ არჩევნებში ამომრჩევლების მონაწილეობის მზაობასაც. შედეგების მიხედვით, თბილისელების 40%-ს აქვს ადგილობრივ არჩევნებში მონაწილეობის მაღალი მოტივაცია, ხოლო პროევროპული ოპოზიციის ამომრჩეველთა შორის ასეთია მხოლოდ 34%.

9 ივლისს ევროპარლამენტმა დაამტკიცა რეზოლუცია, რომელშიც ნათქვამია, რომ 4 ოქტომბრის არჩევნები არსებული პოლიტიკური და სამართლებრივი პირობების გათვალისწინებით, არ წარმოადგენს ქართველი ხალხის დემოკრატიული არჩევანის გამოხატვის რეალურ შესაძლებლობას.