კობახიძე ივანიშვილის დასანქცირებაზე: „ჯილდოა ეროვნული ინტერესების დაცვისთვის“

კობახიძის თქმით, ივანიშვილი დე ფაქტო სანქციების ქვეშ აქამდეც იყო და მას თითქმის სამი წლის განმავლობაში ფორმალური სანქციებით აშანტაჟებდნენ.

„თქვენ იცით, რა იყო ჩვენი ქვეყნის გამოწვევები 2022 წელს, რას ითხოვდნენ გუნდისგან, რას ითხოვდნენ კონკრეტულად ბატონი ბიძინა ივანიშვილისგან და სწორედ იმის გამო, რომ ის არ დაუპირისპირდა ჩვენი ქვეყნის ძირეულ, საკვანძო ინტერესებს, ამის გამო ჯერ აამოქმედეს დე ფაქტო სანქციები და ახლა უკვე, საბოლოო ჯამში, მიიღეს ისეთი გადაწყვეტილება, რასაც არ აქვს არავითარი არსებითი დატვირთვა. პირიქით, ამ გადაწყვეტილებით საბოლოო ჯამში გამოიცალეს მათ ხელიდან შანტაჟის ინსტრუმენტი. ეს არის ის, რასაც აკეთებდა სამი წლის განმავლობაში ის ძალა, რასაც ჩვენ ვუწოდებთ გლობალურ ომის პარტიას. მე მაქვს ძალიან დიდი იმედი, რომ ყველაფერი სხვა მიმართულებით შეიცვლება“, - უთხრა კობახიძემ ჟურნალისტებს.

27 დეკემბერს შეერთებულმა შტატებმა „ქართული ოცნების“ დამფუძნებელს ფინანსური სანქციები დაუწესა „რუსეთის ფედერაციის სასარგებლოდ საქართველოს დემოკრატიული და ევროატლანტიკური მომავალთვის ძირის გამოთხრის გამო“.

სახაზინო დეპარტამენტის უცხოური აქტივების კონტროლის ოფისმა (OFAC) ბიძინა ივანიშვილი სპეციალურად დასანქცირებული მოქალაქეების და ბლოკირებული პირების სიაში დაამატა. სანქციები ითვალისწინებს კონკრეტული ტრანზაქციების შეჩერებას, მათ შორის, სინგაპურის სააპელაციო სასამართლოში Credit Suisse-ის წინააღმდეგ ივანიშვილის დავასთან დაკავშირებული გადაწყვეტილების, ბრძანების, ან მორიგების აღსრულებლად და ნებისმიერი გადახდის განსახორციელებლად OFAC-ის ნებართვა იქნება საჭირო.