საქართველოს არალეგიტიმურმა პრემიერ-მინისტრმა, ირაკლი კობახიძემ დაადასტურა, რომ თანამდებობა დატოვა ამერიკის შეერთებულ შტატებში საქართველოს ელჩმა დავით ზალკალიანმა. როგორც მან დღეს გამართულ ბრიფინგზე განაცხადა, დიპლომატზე „სერიოზული ზეწოლა იყო“.
ახალი ამბები
მკითხველის რჩეული
- 1 მოროდიორი „კადიროველები“ ნიღბიან დამრბევებს შორის თბილისში - რედაქტორის სვეტი
- 2 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 3 პუტინის თქმით, საქართველოს ხელისუფლების სიმამაცით გაკვირვებულია
- 4 ოპოზიციური პარტიები 24 ნოემბერს პარლამენტთან აქციას და ღამისთევას აანონსებენ
- 5 პარლამენტი აღარ არსებობს, რადგან ერთმა პარტიამ თავზე დაიხია კონსტიტუცია - ზურაბიშვილი
- 6 არალეგიტიმური პრემიერი შსს-ს მომიტინგეებზე სასტიკი ძალადობისთვის მადლობას უხდის
„დავით ზალკალიანმა დატოვა თანამდებობა. მე მასთან მქონდა საუბარი. არ ვიცი, ყველას სხვადასხვაგვარი ნებისყოფა აქვს. ამ შემთხვევაში მე მინდა სოლიდარობა გამოვუცხადო დავით ზალკალიანს, რომლის მიმართაც იყო ძალიან მძიმე ზეწოლა სხვადასხვა მხრიდან, აქ არ იგულისხმება „ნაცების“ ზეწოლა. ეს იყო სერიოზული ზეწოლა. სამწუხაროა, რომ მან ეს თანამდებობა დატოვა. ეს იყო მისი არჩევანი და მე ამ არჩევანს პატივს ვცემ“, - თქვა კობახიძემ.
რაც შეეხება საგარეო საქმეთა მინისტრის მოადგილის, თეიმურაზ ჯანჯალიას გადადგომას, ირაკლი კობახიძემ ეს ინფორმაცია უარყო.
„მანამდე შედგა საუბარი მაკა ბოჭორიშვილსა [არალეგიტიმური საგარეო საქმეთა მინისტრი] და თეიმურაზ ჯანჯალიას შორის და გადაწყვეტილება უკვე იყო მიღებული იმასთან დაკავშირებით, რომ იგეგმებოდა ცვლილება. ამ შემთხვევაში, თეიმურაზ ჯანჯალიას თანამდებობა არ დაუტოვებია, ეს იყო საკადრო გადაწყვეტილება, რომელიც მიიღო მაკა ბოჭორიშვილმა. მაკა ბოჭორიშვილმა მას შესთავაზა სისტემაში დარჩენა, რა იქნება მისი გადაწყვეტილება, არ ვიცი“, - აღნიშნა ირაკლი კობახიძემ.
ე.წ. პრემიერ-მინისტრი ასევე გამოეხმაურა შეერთებული შტატების გადაწყვეტილებას, აშშ-საქართველოს სტრატეგიული პარტნიორობის შეჩერების შესახებ და მას „დროებითი მოვლენა“ უწოდა. მისი თქმით, პრეზიდენტ ჯო ბაიდენის ადმინისტრაცია ცდილობს, დონალდ ტრამპის ადმინისტრაციას მაქსიმალურად მძიმე მემკვიდრეობა დაუტოვოს.
„თუმცა, ამას ვერ ექნება ვერავითარი პრინციპული მნიშვნელობა, დაველოდებით ახალ ადმინისტრაციას და ყველაფერზე ვისაუბრებთ ახალ ადმინისტრაციასთან“, - აღნიშნა კობახიძემ.
მას შემდეგ, რაც 28 ნოემბერს ცნობილი გახდა „ქართული ოცნების“ გადაწყვეტილება, რომ 2028 წლის ბოლომდე დღის წესრიგში არ დააყენებს საქართველოს ევროკავშირში გაწევრიანებაზე მოლაპარაკებების გახსნის საკითხს და ასევე, უარს იტყვის ყოველგვარ საბიუჯეტო გრანტზე ევროკავშირის მხრიდან, ქართველმა ელჩებმა თანამდებობების დატოვება დაიწყეს. ამ დროისთვის გადადგომის შესახებ განაცხადეს ბულგარეთში, ნიდერლანდების სამეფოსა და ლიეტუვაში საქართველოს ელჩებმა.
