მოძალადე ჯგუფების თავდასხმის შედეგად „პრაიდის ფესტივალი“ ჩაიშალა

„მოგვიწია ტერიტორიის დატოვება. სამართალდამცველებმა ვერ შეძლეს ტერიტორიის დაცვა. განხორციელდა ევაკუაცია სამარშუტო ტაქსებით“;

„დღეს განვითარებული მოვლენები მიანიშნებს, რომ თავდასხმა წინასწარ კოორდინირებული და შეთანხმებული იყო შინაგან საქმეთა სამინისტროსა და ძალადობრივ დაჯგუფება „ალტ-ინფოს“ შორის“, - ნათქვამია „თბილისი პრაიდის“ მიერ გავრცელებულ განცხადებებში.

მანამდე, ორგანიზაციის ხელმძღვანელმა მარიამ კვარაცხელიამ დახურულ ღონისძიებაზე რეგისტრირებულ მონაწილეებს მოუწოდა, ფესტივალზე არ მისულიყვნენ. მისი თქმით, იქ განვითარებული მოვლენების შედეგად არავინ არის დაშავებული.

„პრაიდის ფესტივალის“ ჩაშლის მიზნით მოქალაქეები სხვადასხვა მოძალადე და ჰომოფობიური ჯგუფის, მათ შორის, „კონსერვატიული მოძრაობა/ალტ-ინფოს“ და ვატო შაქარიშვილის მოძრაობის „საქართველო უპირველეს ყოვლისა“ მოწოდებით მობილიზდნენ. რამდენიმე ასეული ადამიანი ვაჟა-ფშაველას ძეგლთან დილიდან შეიკრიბა და მსვლელობით ლისის ტბისკენ დაიძრა. მსვლელობაში მართლმადიდებელი ეკლესიის სასულიერო პირებიც მონაწილეობდნენ.

ძალადობრივი ჯგუფები ფესტივალის ტერიტორიაზე შესვლას სხვადასხვა მიმართულებიდან ცდილობდნენ. ისინი პოლიციას წინააღმდეგობას უწევდნენ და მაქსიმალურად მიუახლოვდნენ ფესტივალისთვის შემოსაზღვრულ ადგილს.  

„პრაიდის ფესტივალი“ ლგბტქ+ თემის მიერ ორგანიზებული დახურული ღონისძიებაა, რომელსაც „თბილისი პრაიდის“ კვირეული უნდა დაეხურა. ჰომოფობიური და მოძალადე ჯგუფები ავრცელებდნენ ცრუ ინფორმაციას, თითქოს, თბილისის ქუჩებში ე.წ. გეი პარადის ჩატარება იყო დაგეგმილი და ამ გზით მოქალაქეების მობილიზებას ცდილობდნენ, მათ შორის რეგიონებიდანაც.  შინაგან საქმეთა სამინისტრო აცხადებდა, რომ დახურული ღონისძიების მშვიდ ვითარებაში ჩატარების მიზნით, პოლიციის დანაყოფები მობილიზებულნი იქნებოდნენ ყველა საჭირო ლოკაციაზე და მართლწესრიგსა და უსაფრთხოებას დაიცავდნენ.