ოკუპირებულ გალში „უშიშროების ძალების“ დამატებით ნაწილებს შეიყვანენ

„ამ კვირაში პრეზიდენტმა ძალოვან სტრუქტურებს მისცა დავალება, შემოღებული იქნეს დამატებითი შეზღუდვები გალის რაიონში მესაზღვრეების მუშაობის გასაძლიერებლად. ჩვენ ამ სამუშაოს ჩავატარებთ და იმ შემთხვევისთვის, თუ სირტუაცია გაუარესდება, ვეცდებით გავზარდოთ იქ ძალები და მზად ვიყოთ ნებისმიერი პროვოკაციისთვის“, - თქვა ლოლუამ.

18 ოქტომბერს აფხაზეთის დე ფაქტო რესპუბლიკის უშიშროების საბჭოს სხდომა გაიმართა, სადაც მიიღეს გადაწყვეტილება, რომ 23-დან 30 ოქტომბრის ჩათვლით ენგურის ხიდი ჩაიკეტება. ოკუპირებულ რეგიონის მიმართულებით გადაადგილება შეეძლებათ მხოლოდ ე.წ. რესპუბლიკის მოქალაქეებისა და ბინადრობის ნებართვის მქონე პირებს, რომლებიც აფხაზეთში ბრუნდებიან, ასევე „ენგურჰესის“ თანამშრომლებს.

„საზღვრის დაკეტვის შესახებ გადაწყვეტილება, მათ შორის დაკავშირებულია საქართველოში საპარლამენტო არჩევნებთან. ასეთი პრაქტიკა არსებობდა უწინაც - ჩვენ საზღვარს ვკეტავდით საქართველოს ტერიტორიაზე განვითარებული სხვადასხვა მოვლენების დროს, რადგან ბევრი შემთხვევა იყო, როდესაც საზღვარზე აწყობდნენ პიკეტს, მიტინგს და ა.შ. ამიტომ, იმისთვის, რომ ვაკონტროლოთ სიტუაცია და ჩვენს მესაზღვრეებს გავუმარტივოთ საქმე, მიღებული იქნა ასეთი გადაწყვეტილება“, - აღნიშნა რაულ ლოლუამ.

ე.წ. უშიშროების საბჭოს მდივნმა დასძინა, რომ ყურადღებით აკვირდებიან საქართველოს მთელ ტერიტორიაზე სიტუაციას და პროგნოზირებენ აფხაზეთთან მიმართებაში სიტუაციის განვითარების ვარიანტებს.