საქართველოს პარლამენტი 6.7 მილიონ ლარად 60 ახალი ავტომობილის ყიდვას გეგმავს. სატენდერო დოკუმენტაციის მიხედვით, ავტომობილები უნდა იყოს არაუადრეს 2024 წლის გამოშვების, სედანი, ჰიბრიდული და ნებისმიერი ფერის, გარდა შავისა.
ახალი ამბები
მკითხველის რჩეული
- 1 „ცოლად შერთვის მიზნით გაიტაცა და სექსუალურად იძალადა“ - კახეთის პოლიციამ 5 პირი დააკავა
- 2 სამტრედიაში ნიკა მელიას თავს დაესხნენ
- 3 რუსეთმა ზელიმხან ხანგოშვილის მკვლელი, ვადიმ კრასიკოვი დაიბრუნა
- 4 კობახიძემ დააკონკრეტა რომელი ოპოზიციური პარტიების აკრძალვას გეგმავს „ქართული ოცნება“
- 5 შოვის სტიქიაზე ახალი კვლევის გამოქვეყნების შემდეგ ლაშა სუხიშვილი გამოკითხვაზე დაიბარეს
- 6 საქართველოს ხელისუფლება აფგან სადიგოვის აზერბაიჯანისთვის გადაცემას გეგმავს
პარლამენტის აპარატის განცხადებით, ეს შესყიდვა აუცილებელია, რადგან საკანონმდებლო ორგანოს ავტოპარკი მოძველებულია, ხოლო ერთი ავტომობილის საშუალო გარბენი 300 000 კილომეტრს აღემატება. დღეის მდგომარეობით, პარლამენტის აპარატის ბალანსზე 89 ერთეული ავტოსატრანსპორტო საშუალება ირიცხება.
„გამოცხადებული შესყიდვის სავარაუდო ღირებულებაა 6 712 230 ლარი, საიდანაც თავად ავტომანქანების ღირებულება შეადგენს დაახლოებით 5 557 800 ლარს, ხოლო დარჩენილი თანხა 1 154 430 ლარი წარმოადგენს 5-წლიან საგარანტიო პერიოდზე გათვლილ მომსახურების (საწვავი და ტექნიკური მომსახურება) საპროგნოზო ჯამურ ხარჯს“, - განაცხადეს პარლამენტის აპარატში.
ოპოზიციონერი დეპუტატის, რომან გოცირიძის თქმით, პარლამენტში პერსონალური ავტომობილების ყოლა საბჭოთა გადმონაშთია და ეს საქართველოს ეკონომიკურ მდგომარეობასთან შეუსაბამოა. დეპუტატის განცხადებით, „ქართული ოცნების“ 84 წევრიდან 50-ს ავტომობილი ემსახურება.
„საქართველოს პარლამენტი ალბათ არის მსოფლიოში ერთადერთი, როცა მმართველი პარტიის საპარლამენტო უმრავლესობიდან პარლამენტის ყოველ მეორე წევრს ემსახურება პერსონალური ავტომობილი.
ავტომობილები ცვდება და მათი გამოცვლა რომ საჭიროა ამაზე არავინ დავობს, მაგრამ ის, რაც საქართველოს პარლამენტში ხდება, ყოველგვარ ზნეობრივ თუ ფინანსურ ლოგიკასაა მოკლებული. ეს ხდება მაშინ, როდესაც ნოემბრის თვიდან პარლამენტის რიგითი წევრის ხელფასი ორმაგდება და იგი 8 ათასი ლარი ხდება, ხოლო თანამდებობების მქონე დეპუტატების ხელფასი კიდევ უფრო მეტად იზრდება, რაც ზოგ შემთხვევაში 10 ათას ლარსაც კი გადააჭარბებს.
პერსონალური მანქანების საბჭოთა გადმონაშთი უნდა მოისპოს. ასეა ყველა სამინისტროში და სახელმწიფო დაწესებულებაში. ეს მით უფრო მიუღებელია ისეთი ქვეყნისათვის, რომლის მოსახლეობის მეოთხედი სიღატაკის გამო ან სახელმწიფო სოციალურ დახმარებას იღებს ან მისი მიღების რიგში დგას“, - თქვა რომან გოცირიძემ.
ახალი ავტომანქანები ექსპლუატაციაში 2025 წლიდან შევა და მომდევნო, მე-11 მოწვევის პარლამენტის დეპუტატებს მოემსახურება.
![საქართველოს ამბები](/images/a2.png#joomlaImage://local-images/a2.png?width=80&height=80)