პატრიარქი - დიდია ჩვენი მწუხარება ბახმუტთან ხუთი ქართველის დაღუპვის გამო

„დიდია თქვენი და ჩვენი მწუხარება ა.წ. 3 დეკემბერს ბახმუტთან სასტიკი ბრძოლის დროს ხუთი ქართველის - ავთანდილის, რომეოს, რომეოს, მერაბის და ბადრის გარდაცვალების გამო, რომელთაც მოყვასის თანადგომისათვის გაწირეს სიცოცხლე.

აღვავლენთ ლოცვებს, რათა უფალმა სავანესა მართალთასა დააწესოს მათი უკვდავი სული, ხოლო თქვენ მოგანიჭოთ ლოცვის ძალა და ურყევი რწმენა იმისა, რომ სიცოცხლე არ მთავრდება გარდაცვალებით, არამედ იგია დასაწყისი მარადიული, ჭეშმარიტი ცხოვრებისა, რომლისთვისაც ჩვენ ყველანი უნდა მოვემზადოთ“,- ნათქვამია პატრიარქის სამძიმრის წერილში, რომელიც საპატრიარქომ გამოაქვეყნა.

ხუთი ქართველი მებრძოლი დონეცკის ოლქის ქალაქ ბახმუტში 3 დეკემბერს დაიღუპა. მათი ცხედრების გამოტანა ამ დრომდე ვერ ხერხდება, რადგან ტერიტორია რუს სამხედროებს აქვთ დაკავებული. მანამდე, 1-ელ დეკემბერს, კიევში კიდევ ერთი ქართველი მებრძოლი, 27 წლის ჯაბა (ჯამბულათ) ხოფერია გარდაიცვალა. უკრაინაში რუსეთის მიერ დაწყებულ ომს უკვე 34 ქართველი ემსხვერპლა. საქართველოს პრემიერ-მინისტრმა ირაკლი ღარიბაშვილმა უკრაინაში დაღუპულ ქართველებს „საწყალი ბიჭები“ უწოდა და თქვა, რომ ისინი საბრძოლველად „ომის პარტიას“ მიჰყავს.

ნოემბერში ცნობილი გახდა, რომ საქართველოს კათოლიკოს-პატრიარქმა ილია მეორემ რუსეთის მართლმადიდებელი ეკლესიის მეთაურს, რომელიც 20 ნოემბერს 76 წლის გახდა, დაბადების დღე მიულოცა. მილოცვის ტექსტი რუსეთის საპატრიარქომ გაავრცელა.

უკრაინაში რუსეთის ომის მხარდაჭერის გამო, რუსეთის პატრიარქს სანქციები დაუწესეს დიდი ბრიტანეთის და კანადის მთავრობებმა. მის სანქცირებას ევროკავშირიც აპირებდა, თუმცა უნგრეთის წინააღმდეგობის გამო სანქციათა მეექვსე პაკეტში მოსკოვისა და სრულიად რუსეთის მე-16 პატრიარქის სახელი და გვარი  (ვლადიმერ გუნდიაევი) არ შევიდა.

პატრიარქი კირილი საქართველოს ოკუპირებული ტერიტორიების, აფხაზეთის და ცხინვალის რეგიონის ე.წ. დამოუკიდებლობას აღიარებს.