ახალი ამბები

„თქვენო უწმინდესობავ! ქრისტესმიერი სიყვარულით გილოცავთ თქვენს დაბადების დღეს! ამ რთულ დროში, გისურვებთ ჯანმრთელობას და ყველა ღვთაებრივ სიკეთეს.

გისურვებთ, ასევე, რომ თქვენი და საერთო ძალისხმევით, რაც შეიძლება მალე აღდგენილიყოს სამართლიანობა და მშვიდობა რუსეთსა და უკრაინას შორის, ჩვენს სახელმწიფოებს შორის.

უფალი გფარავდეთ თქვენ და თქვენს სამწყსოს!  ქრისტესმიერი სიყვარულით ილია მეორე, სრულიად საქართველოს კათოლიკოს-პატრიარქი“, - აღნიშნულია წერილში.

24 თებერვალს უკრაინაში რუსეთის შეჭრის შემდეგ, რუსეთის პატრიარქმა ქადაგების დროს არაერთხელ დაუჭირა მხარი პრეზიდენტ ვლადიმერ პუტინის მიერ დაწყებულ ე.წ. სპეციალურ სამხედრო ოპერაციას. ის ამბობდა, რომ რუსეთი არასდროს არავის დასხმია თავს და „მხოლოდ თავის საზღვრებს იცავდა“.

25 სექტემბრის ქადაგებაში მან თქვა, რომ მართლმადიდებელ ეკლესიას სწამს იმ სამხედრო მოსამსახურეებისთვის ცოდვების შენდობისა, რომლებიც სამხედრო ფიცს აღასრულებენ.

უკრაინაში რუსეთის ომის მხარდაჭერის გამო, რუსეთის პატრიარქს სანქციები დაუწესეს დიდი ბრიტანეთის და კანადის მთავრობებმა. მის სანქცირებას ევროკავშირიც აპირებდა, თუმცა უნგრეთის წინააღმდეგობის გამო სანქციათა მეექვსე პაკეტში მოსკოვისა და სრულიად რუსეთის მე-16 პატრიარქის სახელი და გვარი  (ვლადიმერ გუნდიაევი) არ შევიდა. ამასთან, 16 ნოემბერს კირილიმ განაცხადა, რომ „მიღებულია უპრეცედენტო გადაწყვეტილება: არ შეუშვან პატრიარქი ევროკავშირის ტერიტორიაზე“. კირილის თქმით, ასეთი რამ „ცივი ომის“ დროსაც კი არ მომხდარა.

პატრიარქი კირილი საქართველოს ოკუპირებული ტერიტორიების, აფხაზეთის და ცხინვალის რეგიონის ე.წ. დამოუკიდებლობას აღიარებს. გარდა ამისა, ის ილია მეორეს სრული ტიტულით - ბიჭვინთისა და ცხუმ-აფხაზეთის მიტროპოლიტად არ მოიხსენიებს.