რიკოთის გზის მშენებლობაზე დასაქმებული მუშა მაშველებმა გარდაცვლილი იპოვეს

გარდაცვლილი 50 წლის რამაზ ბარბაქაძეა, რომელიც ხარაგაულის მუნიციპალიტეტის სოფელ ბორითიდან იყო. ადგილობრივების ინფორმაციით, ის უბისასთან მშენებარე ხიდიდან გუშინ გადმოვარდა, შემდეგ კი მდინარის დინებამ გაიტაცა. ცხედარი შემთხვევის ადგილიდან დაახლოებით 5-6 კილომეტრში დღეს იპოვეს.

შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 240-ე მუხლის მეორე ნაწილით დაიწყო, რაც გულისხმობს სამშენებლო სამუშაოების წარმოებისას უსაფრთხოების წესის დარღვევას, რამაც ადამიანის სიცოცხლის მოსპობა ან სხვა მძიმე შედეგი გამოიწვია.

ხევი-უბისას 12.2 კილომეტრიან მონაკვეთზე არაერთი ხიდი და გადასასვლელი შენდება. სამშენებლო სამუშაოებს საავტომობილო გზების დეპარტამენტის მიერ გამოცხადებულ ტენდერში გამარჯვებული ჩინური კომპანია შპს „ჰუნანის გზებისა და ხიდების სამშენებლო ჯგუფი“ (Hunan Road and Bridge Construction Group) ასრულებს.