რუსეთში ქართული ღვინის იმპორტზე შეღავათიანი რეჟიმის გაუქმებას ითხოვენ

ასოციაციის მონაცემებით, რუსეთის ბაზარზე იმპორტირებული ღვინის წილი 2023 წელს, წინა წელთან შედარებით, 4 პროცენტული პუნქტით გაიზარდა და 48% შეადგინა, ხოლო რუსეთში წარმოებული ღვინის რეალიზაციის წილი ამ დროის განმავლობაში შემცირდა.

„მივიღეთ გადაწყვეტილება კვლავ მივმართოთ მთავრობას და სახელმწიფო დუმას თხოვნით, გაძლიერდეს ზომები რუსეთის ბაზრის დასაცავად“, - განუცხადა ასოციაციის აღმასრულებელმა დირექტორმა, ალექსეი პლოტნიკოვმა რუსულ მედიას.

მევენახეთა და მეღვინეთა ასოციაცია სექტემბრიდან მაღაზიებსა და კაფეებში რუსული ღვინისთვის 20%-დან 50%-მდე კვოტის დაწესების ინიციატივითაც გამოდის.

რუსეთის მევენახეთა და მეღვინეთა ასოციაცია ათობით კომპანიას აერთიანებს. 2019 წლიდან მის საბჭოს ტელეწამყვანი, რუსეთის მთავრობის პროპაგანდისტული მედიასაშუალება Russia Today-ის გენერალური დირექტორი დმიტრი კისილიოვი ხელმძღვანელობს, რომელიც თვითონაც მეღვინეობით არის დაკავებული და ოკუპირებულ ყირიმში ღვინის საწარმო Cock t'est belle-ს ფლობს.

რუსეთი ქართული ღვინის მთავარი საექსპორტო ბაზარია, სადაც, საქსტატის მონაცემებით, 2023 წელს 168 304 300 აშშ დოლარის ღირებულების დაახლოებით 62 მილიონი ტონა ყურძნის ნატურალური ღვინო გავიდა. წლის პირველ ხუთ თვეში საქართველო ღვინის იმპორტიორ ქვეყნებს შორის პირველ ადგილზე იყო. ამასთან, 2023 წელს, 2022 წელთან შედარებით, საქართველოდან რუსეთში ღვინის ექსპორტი 10.9%-ით არის შემცირებული.

რუსეთში საქართველოდან ღვინის იმპორტის გადასახადი ნულოვანია.