რუსი პროპაგანდისტის განცხადებების გამო სომხეთმა რუსეთის ელჩს საპროტესტო ნოტა გადასცა

სომხეთის საგარეო საქმეთა სამინისტროს განმარტებით, გადაცემის მსვლელობის დროს „გაჟღერდა ხელოვნურად გენერირებული ნარატივები, რომლებიც მიმართული იყო სომხეთის რესპუბლიკის სუვერენიტეტისა და ტერიტორიული მთლიანობის წინააღმდეგ“.

„15 იანვარს სომხეთის რესპუბლიკაში რუსეთის ფედერაციის ელჩი ს.პ. კოპირკინი სომხეთის საგარეო საქმეთა სამინისტროში იქნა გამოძახებული. შეხვედრისას ელჩს გადაეცა შესაბამისი საპროტესტო ნოტა“, - განაცხადეს დიპლომატიურ უწყებაში.

გადაცემაში „ვესტი ნედელი“ დმიტრი კისილიოვი ამბობს, რომ სომხეთის პრემიერ-მინისტრმა ნიკოლ ფაშინიანმა „სრულიად უგულებელყო როგორც სამმხრივი შეთანხმების ფარგლებში საკუთარი ვალდებულებები, ასევე ილჰამ ალიევის კატეგორიული მოთხოვნა, ბოლოსდაბოლოს გაიხსნას ზანგეზურის დერეფანი“.

გარდა ამისა, კისილიოვმა განაცხადა, რომ სომხეთმა ევროკავშირში გაწევრიანება დაიწყო და მთავრობამ უკვე მოამზადა შესაბამისი კანონპროექტი, რასაც რუსეთში უკვე უწოდეს ევრაზიის ეკონომიკური კავშირიდან გასვლის პროცესის დაწყება. კისილიოვმა აღნიშნა, რომ სომხეთი რუსულ გაზს შეღავათიან ფასად იღებს, თუმცა აღნიშნული ორგანიზაციიდან გასვლის შემდეგ „ასეთი სასათბურე პირობებით“ ვეღარ ისარგებლებს, გარდა ამისა, სომხური პროდუქციის ექსპორტი 70-80%-ით შემცირდება.

კისილიოვის მტკიცებით, პრემიერ-მინისტრი „რუსეთთან, ახლანდელ მოკავშირეებთან და პარტნიორებთან ურთიერთობის შეზღუდვის საკუთარ ხაზს აწვება“. ამის არგუმენტად მან დაასახელა ნიკოლ ფაშინიანის გადაწყვეტილება, რომლის მიხედვითაც სომხეთის დელეგაცია მაისში, ბელარუსის დედაქალაქ მინსკში არ გაემგზავრება ევრაზიის უმაღლესი ეკონომიკური საბჭოს მორიგ სხდომაზე დასასწრებად და მონაწილეობას ვიდეოკონფერენციის საშუალებით მიიღებს. 

„კურსი გასაგებია - მთელი იმედები საფრანგეთის პრეზიდენტ ემანუელ მაკრონზეა. კარგი არაფრით დასრულდება, როგორც იტყვიან, თქვენი არჩევანი“, - თქვა პროპაგანდისტმა. კისილიოვმა აღნიშნა, რომ სომხეთი, სავარაუდოდ, „საფრანგეთიდან დიდი რაოდენობით იარაღს იღებს, აშკარად ემზადება ახალი ომისთვის“.