რაჭაში, კურორტ შოვის ტერიტორიაზე მომხდარი სტიქიური უბედურების შედეგად დაღუპული 22-ე ადამიანის ცხედარი იპოვეს, 11-ის საძიებო სამუშაოები კი გრძელდება. როგორც საგანგებო სიტუაციების მართვის სამსახურის უფროსმა, თემურ მღებრიშვილმა განაცხადა, ცხედარი მდინარე რიონის კალაპოტში, სტიქიის ეპიცენტრიდან 20 კილომეტრში ნახეს.
ახალი ამბები
მკითხველის რჩეული
- 1 მოროდიორი „კადიროველები“ ნიღბიან დამრბევებს შორის თბილისში - რედაქტორის სვეტი
- 2 აქციების დროს თბილისში რუსეთის პოლიციის პროფკავშირების ასოციაციის უფროსი იმყოფებოდა
- 3 პუტინის თქმით, საქართველოს ხელისუფლების სიმამაცით გაკვირვებულია
- 4 არალეგიტიმური პრემიერი შსს-ს მომიტინგეებზე სასტიკი ძალადობისთვის მადლობას უხდის
- 5 „ქართული ოცნების“ დე-ფაქტო მთავრობა არალეგიტიმურია - ჰელსინკის კომისია
- 6 სპეცრაზმი რუსთაველის გამზირზე აქციის მონაწილეებს არბევს
„ამ დროისთვის მიმდინარეობს ცხედრის ამოსვენების ღონისძიება. გარდა ამისა, ნაპოვნია ადამიანის ქვედა კიდური და მიმდინარეობს აქტიური საძიებო სამუშაოები. ცხედარი წყალს არ გამოურიყავს, ეს არის მონიტორინგის შედეგი, 20 კილომეტრის მოშორებით სტიქიის ეპიცენტრიდან. ქვედა კიდური ნანახია სტიქიის ეპიცენტრიდან 24 კილომეტრის მოშორებით.
მდინარის დონე მეტ-ნაკლებად უკვე დაწეულია, შესაბამისად, რიონის კალაპოტში გამოჩნდა პატარა კუნძულები, სადაც დიდი რაოდენობით ინერტული მასალა, მორებია მოგროვილი და ამ ყველაფრის გადამოწმების შედეგად მივიღეთ ეს შედეგი“, - განაცხადა მღებრიშვილმა ჟურნალისტებთან.
საგანგებო სიტუაციების მართვის სამსახურის უფროსის თქმით, დღეს მდინარის მონიტორინგი 30-კილომეტრიან მონაკვეთზე ხორციელდება, თუმცა დღის ბოლოს ან ხვალ დილიდან პერიმეტრი 54 კილომეტრამდე გაიზრდება - „ეს იქნება უკვე ამბროლაურის ტერიტორია. ვეცდებით, რომ მდინარის კალაპოტში მონიტორინგი მაქსიმალურად ეფექტურად მოხდეს“.
რაჭაში, კურორტ შოვის ტერიტორიაზე 3 აგვისტოს მოვარდნილმა გლაციალურმა ღვარცოფმა კურორტი თითქმის მთლიანად გაანადგურა. 10 აგვისტოს ჩათვლით ნაპოვნი იყო 21 ცხედარი, საიდანაც 19 ამოცნობა მოხერხდა. ოფიციალური ინფორმაციით, დაკარგულად მიიჩნევა 11 ადამიანი, მათ შორის არიან ბავშვები. სტიქიის ადგილას სამაშველო ოპერაცია ღვარცოფის მოვარდნიდან მხოლოდ სამი საათის შემდეგ დაიწყო, ტალახში მოყოლილი ადამიანები გადაუდებელ დახმარებას ითხოვდნენ. სტიქიის ზონიდან ვერტმფრენებით 210 ადამიანი გამოიყვანეს.
