„აირჩიე ევროპა“ - ასე ჰქვია ახლად შექმნილ სამოქალაქო მოძრაობას, რომლის მიზნად საქართველოს ევროპული მომავლის, მისი დამოუკიდებლობისა და თავისუფლების დაცვა დასახელდა. „აირჩიე ევროპის“ დამფუძნებლები უსაფრთხოების ექსპერტი ხათუნა ლაგაზიძე, პოლიტიკის ანალიტიკოსი, თბილისის სახელმწიფო უნივერსიტეტის პროფესორი ლელა ჯეჯელავა, ევროპული პოლიტიკის ექსპერტი გიორგი რუხაძე, ბიზნესმენი ივა ჭყონია და საქართველოს უნივერსიტეტის პროფესორი, დოქტორი ლაშა ძებისაშვილი არიან.
ახალი ამბები
მკითხველის რჩეული
- 1 „ოცნების“ საარჩევნო ქოლცენტრები რეგიონებში და ზეწოლა ამომრჩევლებზე
- 2 თეთრიწყაროს მოსამართლემ 30 უბნის შედეგები გააუქმა ხმის ფარულობის დარღვევის გამო
- 3 Edison: ეგზიტპოლსა და ცესკოს შედეგებს შორის 13%-იანი სხვაობა მანიპულირებაზე მიუთითებს
- 4 „გვაქვს 81 ფაქტი და ეს სისტემურობაზე მიუთითებს“ - „ოცნება“ ოპოზიციას ხმების მოპარვაში ადანაშაულებს
- 5 არჩევნების დროს საქართველოში აშშ-ის მიერ სანქცირებული რუსი პროპაგანდისტი იმყოფებოდა
- 6 კორძაია ომბუდსმენს სთხოვს პასუხს, დაირღვა თუ არა ამომრჩევლის ხმის ფარულობა არჩევნებზე
„ჩვენ გთავაზობთ, საზოგადოების ფართო მონაწილეობით შევქმნათ სტრატეგიული დიალოგის პლატფორმა საქართველოს განვითარების გრძელვადიანი გეგმის შესამუშავებლად. ეს სტრატეგია უნდა გახდეს საბაზისო დოკუმენტი მომდევნო მთავრობებისთვის“, - მიმართა ხათუნა ლაგაზიძემ დამსწრეებს.
ახალი სამოქალაქო მოძრაობის პრეზენტაციაზე სიტყვით საქართველოს პრეზიდენტიც გამოვიდა. სალომე ზურაბიშვილმა ხელისუფლება ევროპული გზიდან გადახვევის გამო გააკრიტიკა და თქვა, რომ მოახლოებულ საპარლამენტო არჩევნებზე ქვეყნის ბედი გადაწყდება.
„დარჩა ცოტა დრო, ასი დღე. ასი დღე ცოტაც არის და ბევრია იმისთვის, რომ საზოგადოებამ თავისი სათქმელი თქვას. ჩვენ არ გვექნება ჩვეულებრივი არჩევნები. ეს არ არის რაღაც საარჩევნო კამპანია, თორემ მე, როგორც პრეზიდენტი, აქ არ ვიქნებოდი. ეს არის ქვეყნის ბედის არჩევანი. ეს არის ჩვენი მომავლის არჩევანი, ეს არის ნამდვილად რეფერენდუმი. ამ რეფერენდუმში, ერთი მხრივ, არის საქართველოს საზოგადოება, მეორე მხარეს არის ხელისუფლება, რომელმაც ჩვენს მომავალს გაუკეთა უზურპაცია. არ შეიძლება, ამაზე დავთანხმდეთ. საჭიროა, გავერთიანდეთ“, - განაცხადა ზურაბიშვილმა.
სამოქალაქო მოძრაობას უერთდებიან კინორეჟისორი ლანა ღოღობერიძე, მუსიკოსი ნინო ქათამაძე, დირიჟორი და კომპოზიტორი ნიკოლოზ რაჭველი, რეჟისორი ლევან წულაძე, ორგანიზაცია „12 სართული“, ჯგუფ „წინაპრების“ დამფუძნებელი და ტელეწამყვანი სოფიო ხუნწარია, ანსამბლ „სუხიშვილების“ დირექტორი ნინო სუხიშვილი, მხატვარი გოგი ალექსი-მესხიშვილი, მედიცინის დოქტორი, იმუნოლოგი გიორგი კამკამიძე, 2020 წლის მასწავლებლის ეროვნული ჯილდოს გამარჯვებული სოფო გოგოხია და სხვები. მათ ხელი მოაწერეს მანიფესტს, რომელშიც ნათქვამია, რომ მხოლოდ ფიქრითა და ოცნებით საქართველო საკუთარ ისტორიულ არჩევანს რეალობად ვერ აქცევს - „საჭიროა თითოეული ჩვენგანის აქტიური მოქმედება ევროპული მომავლის გადასარჩენად და ქვეყნის დემოკრატიისა და განვითარების შეუქცევად გზაზე დასაბრუნებლად“.
სამოქალაქო მოძრაობა 18 ივლისიდან 26 ოქტომბრამდე 100-დღიანი უწყვეტი „ევროპულ მარათონი“ ჩატარებას გეგმავს, რომლის ფარგლებშიც საქართველოს მოსახლეობას მომავალი არჩევნების მნიშვნელობის შესახებ ინფორმაციას მიაწვდიან და ემიგრანტებს საკონსულო რეგისტრაციაში დაეხმარებიან.
