თსუ-ის რექტორის მოვალეობის შემსრულებლის კონკურსში მხოლოდ ჯაბა სამუშია მონაწილეობს

უნივერსიტეტის ადმინისტრაციის განმარტებით, უახლოეს დღეებში, საარჩევნო კომისია ჯაბა სამუშიას მიერ წარდგენილ საბუთებს შეამოწმებს და თუ ხარვეზი არ გამოვლინდება, რექტორის მოვალეობის შემსრულებლის თანამდებობის დასაკავებლად არჩევნები 20 ოქტომბერს ჩატარდება. აკადემიური საბჭო რექტორის მოვალეობის შემსრულებელს ფარული კენჭისყრით, სიითი შემადგენლობის უმრავლესობით, არაუმეტეს ექვსი თვის ვადით აირჩევს. ამ ვადის გასვლის შემდეგ რექტორის შესარჩევად კონკურსი გამოცხადდება.

რექტორის მოვალეობის შემსრულებლის კანდიდატთა რეგისტრაცია 11 ოქტომბერს დაიწყო და 13 ოქტომბერს დასრულდა. ეს პროცესი ჯერ დაწყებული არ იყო, როდესაც ჯაბა სამუშიას სოციალურ ქსელში თსუ-ს რექტორობას ულოცავდნენ, მათ შორის, „ქართულ ოცნებასთან“ დაახლოებული პირები. სამუშიას ამაზე განმარტების გაკეთებაც მოუწია და თქვა, რომ რექტორად მისი დანიშვნის შესახებ არასწორი ინფორმაცია გავრცელდა.

„არაფერი მსგავსი არ მომხდარა და ეს რამდენიმე სააგენტოს მიერ გავრცელებული დეზინფორმაციაა. გასაგებია რასაც ისახავენ მიზნად, მაგრამ ამჯერად ამაზე არ გავამახვილებ ყურადღებას. ვწუხვარ, რომ ბევრმა ეს ინფორმაცია სანდოდ მიიღო. თსუ-ს წესდება არეგულირებს არჩევნების წესს და არავინ არავის არ ნიშნავს“, - თქვა მან.

ჯაბა სამუშია 2010-2014 წლებში თბილისის საკრებულოს თავმჯდომარის მოადგილე იყო. 2014 წელს ის საკრებულოს წევრად მეორე ვადით, „ქართული ოცნებიდან“ აირჩიეს და 2017 წლამდე ქონების მართვისა და საფინანსო-საბიუჯეტო კომისიას თავმჯდომარეობდა.

„მაისის სტუდენტური მოძრაობა“ აცხადებს, რომ ჯაბა სამუშია ხელისუფლების მიერ წინასწარ შერჩეული კანდიდატია, რომელსაც „არალეგიტიმური აკადემიური საბჭო მოჩვენებითი არჩევნების პროცესის შემდეგ დანიშნავს“. მოძრაობის წევრები აკადემიური საბჭოს დაშლას და რექტორის არჩევის წესის შეცვლას ითხოვენ. ისინი მიიჩნევენ, რომ ახალი რექტორი პროფესორების სრულმა შემადგენლობამ უნდა აირჩიოს.

თსუ-ს რექტორმა გიორგი შარვაშიძემ აკადემიურ საბჭოს გადადგომის შესახებ 7 ოქტომბერს მიმართა. შარვაშიძეს უფლებამოსილების ვადის ამოწურვამდე 2 წელი აქვს დარჩენილი. ის რექტორის მოვალეობას 15 ოქტომბრამდე შეასრულებს.