ვასილ მაღლაფერიძე საზმაუს სამეურვეო საბჭოს თავმჯდომარედ კიდევ ერთხელ აირჩიეს

სამეურვეო საბჭოს სხდომა და ღია კენჭისყრა მაუწყებლის ახალ შენობასთან პროტესტის ფონზე გაიმართა. მაღლაფერიძის კანდიდატურა ბონდო მძინარიშვილმა დაასახელა.

სამეურვეო საბჭოს წევრებმა – ლაშა ტუღუშმა, ლიკა ბასილაია-შავგულიძემ და ზაზა აბაშიძემ ვასილ მაღლაფერიძის არჩევის საწინააღმდეგო პოზიციები დააფიქსირეს.

„ბატონი ვასილ მაღლაფერიძე 2005 წლიდან პირველი თავმჯდომარეა, რომელმაც თავისი თანამშრომლები ციხისთვის გაიმეტა“, – განაცხადა ტუღუშმა. მან სამეურვეო საბჭოს 21 მარტის სხდომა გაიხსენა, სადაც მაღლაფერიძემ და საბჭოს კიდევ 7-მა წევრმა მოითხოვეს, პროკურატურამ გამოიძიოს „პირველი არხის“ თანამშრომლების მიერ არხის პოლიტიკასთან დაკავშირებით გაკეთებული კრიტიკული განცხადებები.

„თქვენ იყავით წინააღმდეგი, რომ პროგრამულ პრიორიტეტებში შეგვეტანა საქართველოს ევროკავშირში გაწევრიანება. თქვენ შეიძლება თქვენი მოსაზრებები გქონდეთ, მაგრამ მაქვს უფლება არ დაგეთანხმოთ, რატომ არ შეიძლება ჩვენ, საზოგადოებრივმა მაუწყებელმა, პროგრამულ პრიორიტეტებში არ ჩავწეროთ საქართველოს ევროკავშირში გაწევრიანება. აბსოლუტურად მიუღებელია ჩემთვის და ეს არის კიდევ ერთი მიზეზი, რის გამოც ვერ დაგიჭერთ მხარს ამ პოზიციაზე.

მესამე მიზეზი ეს არის თქვენი დამოკიდებულება ზოგადად კანონების მიმართ. თქვენ წინა ჯერზე, ჩემი აზრით, უკანონოდ ჩაატარეთ ის შეხვედრა [21 მარტის სხდომა] და ასევე, კანონის დარღვევით დაავალეთ ქალბატონ ელენე მიხაილოვას საქმე, რომელიც არ შედის მის კომპეტენციაში, [...] ის არის ადმინისტრაციის წარმომადგენელი და იკვლევდა თავისივე ადმინისტრაციის საქმეს, რაც სერიოზული პრობელმაა.

ეს ყველაფერი რომც არ ყოფილიყო, თქვენი სტილი არის მიუღებელი. ამ 3 წლის განმავლობაში, ბატონო ვასილ, არ მახსენდება ერთი თქვენი კრიტიკული მოსაზრება, კრიტიკული შენიშვნა ადმინისტრაციის მისამართით. კი მაგრამ, ეს რა ფორმაა, რა სტილია. ჩვენი მოვალეობაა ვიყოთ კრიტიკულები, მათ შორის ფინანსების ხარჯვასთან, პროგრამულ პრიორიტეტებთან დაკავშირებით. ერთი კრიტიკული მოსაზრება თქვენი მხრიდან არ გამოთქმულა და თქვენ ყველანაირად ცდილობდით, რომ ფილტრაცია მომხდარიყო ბორდის და მაქსიმალურად შეგეზღუდათ ის კრიტიკული, თუ რაღაც ისეთი მოსაზრებები, რომელიც არსებობდა ამ ბორდში“, – თქვა ტუღუშმა.

ლიკა ბასილაია-შავგულიძის განცხადებით, ვასილ მაღლაფერიძის თავმჯდომარეობას მხარს არ უჭერს, რადგან ის საზოგადოებრივ მაუწყებელზე „პერმანენტულ რეჟიმში“ რუსულ პროპაგანდას აწარმოებს.

ზაზა აბაშიძე გამოეხმაურა ზოგიერთი ტელევიზიის და პოლიტიკური აქტორის მხრიდან გავრცელებულ დეზინფორმაციას, თითქოს, საზოგადოებრივი მაუწყებლის რამდენიმე კრიტიკულად განწყობილ თანამშრომელს „უკანონო შემოსავლები“ აქვს და ვასილ მაღლაფერიძეს ჰკითხა, უნდა დაიცვას თუ არა სამეურვეო საბჭომ ეს თანამშრომლები.

„მე მგონია, რომ ეს არის საერთო გაშავების კამპანიის ნაწილი, რომელიც იმ ადამიანების წინააღმდეგ მიმდინარეობს, ვინც უბრალოდ თავისი პოზიცია დააფიქსირეს“, - აღნიშნა აბაშიძემ.

ვასილ მაღლაფერიძემ აბაშიძის შეკითხვა „რიტორიკულად“ მიიჩნია და პირდაპირი პასუხი არ გასცა.

მაღლაფერიძემ კანდიდატურის მოხსნაზე უარი თქვა. „მეტიც, მე პატივისცემას ამით გამოვხატავ ჩემი კოლეგების მიმართ, ვინც დამიჭერენ მხარს, რომ მეც მივცემ საკუთარ თავს ხმას, რომ არ დავიმალო ბუჩქებში და არ გამოვიდეს, რომ, იცი რა, ხალხის თხოვნით არის. მე ვარ მომხრე, თუ ამირჩევთ“, – თქვა მაღლაფერიძემ.

ვასილ მაღლაფერიძე 2017 წლიდან 2020 წლის აგვისტომდე საზოგადოებრივი მაუწყებლის გენერალური დირექტორი იყო. თანამდებობიდან გადადგომის შემდეგ, 2021 წლის იანვარში ის პარტია „ქართული ოცნების“ მაშინდელი თავმჯდომარის, ირაკლი კობახიძის მოადგილედ აირჩიეს, თუმცა მარტში ცნობილი გახდა, რომ პარტიული თანამდებობა და პარტია დატოვა. იმავე წლის აპრილში პარლამენტმა ვასილ მაღლაფერიძე საზოგადოებრივი მაუწყებლის სამეურვეო საბჭოს წევრად აირჩია. მაღლაფერიძე „ქართული ოცნების“ მიერ წარდგენილი და მხარდაჭერილი კანდიდატი იყო.