Ադրբեջանը և Վրաստանը համատեղ ընկերություն են ստեղծում Բաքու-Թբիլիսի-Կարսը շահագործելու համար

Ադրբեջանի երկաթուղիների ղեկավար Ռովշան Ռուստամովն ասել է, որ այդ ուղղությամբ աշխատանքներն արդեն սկսվել են, իրավական փաստաթղթեր են նախապատրաստվել, և մոտ ապագայում սպասվում է համատեղ ընկերության ստեղծում։ Կողմերը կունենան ընկերության բաժնետոմսերի 50-50 տոկոսը։

«Համատեղ ընկերության հիմնական գործառույթներն են նախագծերի հետ կապված աշխատանքների իրականացումը, բեռնափոխադրումների սակագների սահմանումը, բեռների փոխադրումը և ընդհանուր առմամբ գործառնական խնդիրների լուծումը»,- հավելել է Ռուստամովը։

Ադրբեջանի երկաթուղու ղեկավարի խոսքով՝ անցյալ տարի սկսված Բաքու-Թբիլիսի-Կարս երկաթուղային գծի ամբողջական արդիականացման և թողունակությունը մինչև 5 մլն տոննա հասցնելու աշխատանքները գրեթե 95 տոկոսով ավարտված են։ Մարտի 2-ին Ադրբեջանի, Վրաստանի և Թուրքիայի երկաթուղային ընկերությունների ղեկավարները ծանոթացել են ավարտված աշխատանքներին։

«Ծրագիրը բաղկացած էր 5 փուլից, որից երեքն արդեն ավարտված է։ Այդ կապակցությամբ վրացական կողմը ներկայացրել է համապատասխան հիմնավոր փաստաթղթեր։ Աշխատանքներն ավարտվում են նաև Ախալքալաքի կայարանում։ Մնացած աշխատանքները նախատեսվում է ավարտել երկու ամսից»,- ադրբեջանական լրատվամիջոցներին ասել է Ռովշան Ռուստամովը։

Ռուստամովի խոսքով՝ Բաքու-Թբիլիսի-Կարս երկաթգիծը, որը հանդիսանում է Միջին միջանցքի կարևորագույն մասերից մեկը, լայն հնարավորություններ է ստեղծում Չինաստանից Եվրոպա և հակառակ ուղղությամբ բեռնափոխադրումների համար. «Ամենամեծ օգուտներից մեկը, որ այս ճանապարհը կբերի մեր երկրին, կլինի տարանցիկ բեռների ծավալների ավելացումը»,- նշել է նա։

Ադրբեջանը, Վրաստանը և Թուրքիան Բաքու-Թբիլիսի-Կարս երկաթուղու կառուցման վերաբերյալ միջազգային համաձայնագիր են ստորագրել 2007 թվականին, նախագծի իրականացումը սկսվել է 2008 թվականին, իսկ 2017 թվականի հոկտեմբերի 30-ին Բաքվում կայացել է երկաթուղու բացման արարողությունը։ Բաքու-Թբիլիսի-Կարս երկաթուղու երկարությունը 826 կմ է, որից 254 կմ-ն անցնում է Վրաստանի տարածքով։ Երկաթուղու վրացական հատվածը ներառում է 22 կամուրջ, 13 կայարան, 24 վերգետնյա անցում և 4 ձնապաշտպան թունել։

Ադրբեջանական կողմի տվյալներով՝ 2017-2022 թվականներին այս երկաթուղային գծով փոխադրված բեռների ծավալը կազմել է 1 347 585 տոննա։