Լրահոս

Իլհամ Ալիևի և Վրաստանի վարչապետ Իրակլի Ղարիբաշվիլիի հանդիպումը տեղի է ունեցել հոկտեմբերի 24-ին Մցխեթայում՝ «Շատո Մուխրանիում»։ Ինչպես նրանք են հայտարարել հանդիպումից հետո կայացած համատեղ ասուլիսում, քննարկված հարցերից մեկը էներգետիկայի ոլորտում համագործակցությունն էր։ Ըստ Իլհամ Ալիևի՝ առաջիկա հինգ տարիների ընթացքում Ադրբեջանը նախատեսում է կրկնապատկել բնական գազի արտահանումը Եվրոպա։

«Մենք դրա հնարավորությունն ունենք և նախատեսում ենք մինչև 2027 թվականը միայն Եվրոպա արտահանել գրեթե 20 միլիարդ խորանարդ մետր բնական գազ։ Իհարկե, այս ուղղությամբ անելիքները քննարկվել են երկկողմ ձևաչափով և անհրաժեշտ են հետագա քննարկումներ։ Միաժամանակ կավելանա արտահանումը Բաքու-Թբիլիսի-Ջեյհան նավթամուղով, գազատարն էլ ավելի բեռնված կլինի։ Մենք ցանկանում ենք օգտագործել Բաքու-Սուփսա նավթամուղը: Ես գիտեմ, որ դա հիմա չի աշխատում: Սա քննարկել ենք նաև վարչապետի հետ։ Ես պարոն վարչապետին տեղեկացրել եմ մեր ծրագրերի մասին։ Այն մեծ ներուժ ունի։

Նոր նախագիծը կապված է էլեկտրաէներգիայի հետ։ Ադրբեջանը մտադիր է էլեկտրաէներգիա արտահանել միջազգային շուկաներ, և, բնականաբար, մեր երթուղին անցնելու է Վրաստանով։ Միայն ազատված հողի վրա կարելի է օգտագործել 10 գիգավատ վերականգնվող էներգիա։ Կասպից ծովում այս թիվը հասնում է 157 գիգավատի։ Սա միջազգային փորձագետների կողմից հաստատված թիվ է։ Շատ մեծ թիվ է։ Իհարկե, այս էներգիայի արտադրությունն ու արտահանումը մեր խնդիրն է առաջիկա տարիների համար։ Վրաստանն ու Ադրբեջանը ակտիվորեն կհամագործակցեն ինչպես այս ոլորտում, այնպես էլ այլ ոլորտներում։ Այնպես որ, մեծ հնարավորություններ կան մեծացնելու մեր տարածաշրջանի տնտեսական ներուժը՝ էներգետիկ ռեսուրսներ, տրանսպորտային միջանցքներ»,- ասել է Ալիևը։

Բացի այդ, ըստ Ալիևի, Ադրբեջանը մտադիր է Բաքու-Թբիլիսի-Կարս երկաթուղու թողունակությունը հասցնել 5 մլն տոննայի, ինչի համար առաջիկա տարիներին լրացուցիչ ներդրումներ կանի նախագծում։

«Աշխարհում Կասպից ծովով Ադրբեջանի, Վրաստանի և հարևան երկրների տարածքով տրանսպորտային ուղիների մեծ կարիք կա։ Տրանսպորտային նոր երթուղիները լիովին համապատասխանում են երթուղու բոլոր երկրների շահերին՝ աշխարհաքաղաքական իրավիճակը հաշվի առնելով։

Հետևաբար, Բաքու-Թբիլիսի-Կարս երկաթուղու թողունակությունը հասցնելով 5 միլիոն տոննայի, միևնույն ժամանակ օգտագործելով վրացական նավահանգիստները Կենտրոնական Ասիայից և ընդհանուր առմամբ Ասիայից դեպի արևմուտք և հակառակը փոխադրվող բեռների ծավալը մեծացնելու համար, ստեղծում է նոր իրականություն։ Մենք պետք է պատրաստ լինենք դրան։

Մենք ցանկանում ենք Բաքվի միջազգային ծովային առևտրային նավահանգստի թողունակությունը 15 միլիոն տոննայից հասցնել 25 միլիոն տոննայի։ Ուստի Վրաստանի և Ադրբեջանի միջև տրանսպորտի ոլորտում պետք է սերտ համակարգում լինի, քանի որ մեր ընդհանուր նախագծերը պետք է ավարտին հասցվեն միաժամանակ։ Տարանցիկ երկիր լինելու համար պետք է լավ հարաբերություններ ունենալ հարևանների հետ։ Առանց նման հարաբերությունների, ոչ մի երկիր չի կարող դառնալ հուսալի տարանցիկ երկիր։ Վրաստանի հետ մեր բարեկամական, եղբայրական, գործընկերային հարաբերությունները ստեղծում են այդ հնարավորությունները»,- ասել է Ալիևը։

Վարչապետ Իրակլի Ղարիբաշվիլին նշել է, որ Ադրբեջանը Վրաստանի կարևորագույն ռազմավարական գործընկերն է։ Ղարիբաշվիլիի խոսքով՝ Վրաստանը պատրաստ է հնարավորինս ակտիվացնել հարաբերությունները Ադրբեջանի հետ՝ ինչպես ընթացիկ, այնպես էլ ծրագրված նախագծերն իրականացնելու համար։

Իրակլի Ղարիբաշվիլին Ադրբեջանի նախագահի հետ ասուլիսում իր ելույթն ավարտել է 1993-2003 թվականներին Ադրբեջանի նախագահ Հեյդար Ալիևի խոսքերով. «Ես կցանկանայի ձեր հոր՝ Ադրբեջանի ազգային առաջնորդի, մի մարդու, ում մենք շատ ենք հարգում՝ Հեյդար Ալիևի խոսքերը հիշել, որոնք նա ասել Վրաստան, Թբիլիսի կատարած այցի ժամանակ՝ դիմելով վրաց հասարակությանը: Ադրբեջանցի և վրացի ժողովուրդներին բախտ է վիճակվել, երբ նրանց հնարավորություն է տրվել ապրել կողք կողքի և սերտ հարաբերություններ հաստատել։ Մեր նախնիները տեսել են այս բախտի պտուղները։ Մեր խնդիրն է հավերժ կյանք տալ այս ավանդույթներին և փոխանցել դրանք գալիք սերունդներին»: