ԱՄՆ-ի պատժամիջոցներից հետո Մոսկվայի ֆոնդային բորսան դադարեցրել է դոլարով և եվրոյով առևտուրը

Հունիսի 12-ին Միացյալ Նահանգների գանձապետարանի արտաքին ակտիվների վերահսկողության գրասենյակը (OFAC) պատժամիջոցներ է սահմանել Մոսկվայի բորսայի դեմ։ Պատժամիջոցների ցանկում են ընդգրկվել նաև Ազգային հաշվարկային դեպոզիտարիան և Ազգային քլիրինգային կենտրոնը, որոնք միջնորդի դեր էին տանում ՌԴ արտարժույթի շուկայում դոլարի առևտրում։

Ռուսաստանի Կենտրոնական բանկը հայտարարել է, որ վերջին երկու տարիների ընթացքում դոլարի և եվրոյի դերը ռուսական շուկայում մշտապես նվազում է, մինչդեռ մայիսին Մոսկվայի բորսայում իրականացված առևտրում չինական յուանի մասնաբաժինը կազմել է 54%: «Այսպիսով, յուանն արդեն դարձել է արտարժույթի առուվաճառքի հիմնական արժույթը։ Յուան/ռուբլի փոխարժեքը հետագիծ կսահմանի այլ արժութային զույգերի համար և կդառնա շուկայի մասնակիցների համար հղման կետ»,- ասել է կարգավորիչը։

ԱՄՆ-ի նոր պատժամիջոցները վերաբերել են ավելի քան 300 իրավաբանական և ֆիզիկական անձանց՝ ինչպես Ռուսաստանից, այնպես էլ այլ երկրներից։

«Ռուսաստանի պատերազմական տնտեսությունը խորապես մեկուսացված է միջազգային ֆինանսական համակարգից, այդ իսկ պատճառով Կրեմլի զինվորականները հուսահատված հասանելիություն են ուզում արտաքին աշխարհի հետ: Այսօրվա գործողությունը [պատժամիջոցները] հարվածում է միջազգային նյութերի և սարքավորումների ստացման մնացած ուղիներին, ներառյալ կախվածությունը երրորդ երկրների կարևոր մատակարարումներից:

Մենք մեծացնում ենք Ռուսաստանի պատերազմական տնտեսության մեջ ներգրավված ֆինանսական հաստատությունների համար ռիսկը և վերացնում խուսափելու ուղիները, ինչպես նաև նվազեցնում ենք Ռուսաստանի հնարավորությունը՝ օգտվելու օտարերկրյա տեխնոլոգիաներից, սարքավորումներից, ծրագրային ապահովման և ՏՏ ծառայություններից», - ասել է ԱՄՆ ֆինանսների նախարար Ջանեթ Յելենը:

Լիազորված իրավաբանական անձինք ներառում են ընկերություններ Չինաստանից, Թուրքիայից, Ղազախստանից, Ղրղզստանից, Բուլղարիայից, Սերբիայից, Հարավային Աֆրիկայից, Արաբական Միացյալ Էմիրություններից, Բելառուսից և Բրիտանական Վիրջինյան կղզիներից: Ըստ OFAC-ի՝ դրանք օգնում են Ռուսաստանին շրջանցել մինչ այժմ սահմանված սահմանափակումները։