ԱՄՆ-ը կարող է ԵԱՀԿ/ԺՀՄԻԳ-ը օգտագործել Վրաստանի ընտրություններին միջամտելու համար. ՌԴ արտաքին հետախուզություն

Այսօր տարածված տեղեկատվության համաձայն՝ ԱՄՆ-ը և ԵԱՀԿ Ժողովրդավարական հաստատությունների և մարդու իրավունքների գրասենյակը պայմանավորվել են Վրաստանի հարցում «համագործակցության» շուրջ։

«Արտաքին հետախուզության ծառայությունից ստացված տեղեկատվության համաձայն՝ ԱՄՆ Պետդեպարտամենտը մտադիր է նոր գործիք կիրառել՝ միջամտելու 2024 թվականի հոկտեմբերի 26-ին Վրաստանում կայանալիք խորհրդարանական ընտրություններին, որպեսզի կանխի ներկայիս իշխող «Վրացական երազանք» կուսակցության հաղթանակը, որը Վաշինգտոնին դուր չի գալիս։ Ամերիկացիները պայմանավորվել են Վրաստանի ուղղությամբ «համագործակցել» ԵԱՀԿ ժողովրդավարական ինստիտուտների ղեկավարության և Մարդու իրավունքների գրասենյակի հետ»,- հայտնել են մամուլի ծառայությունից։

Ռուսական արտաքին հետախուզության տվյալներով՝ նախատեսվում է, որ ԵԱՀԿ/ԺՀՄԻԳ-ը քվեարկությունից 10-20 օր առաջ միջանկյալ զեկույց կհրապարակի՝ եզրակացնելով, որ երկրում ազատ և արդար ընտրությունների համար պայմաններ չկան։

«Կամքի դրսևորման առաջին արդյունքների հրապարակումից հետո եզրակացություն կներկայացվի ընտրական գործընթացի ժողովրդավարության նորմերին չհամապատասխանելու մասին», - նշել են ՌԴ արտաքին հետախուզական ծառայությունում։

Ծառայությունը տեղեկություն է տարածում այն ​​մասին, որ ԱՄՆ-ը ծրագրում է զանգվածային բողոքի ցույցեր անցկացնել Վրաստանում՝ «իշխանությանը բռնի ուժով տիրանալու համար»։ Վերջին մեկ ամսվա ընթացքում սա արդեն երկրորդ նման հայտարարությունն է։

Օգոստոսի վերջին ռուսական արտաքին հետախուզությունը ԱՄՆ-ին մեղադրել է Վրաստանում «գունավոր հեղափոխություն» նախապատրաստելու մեջ։ Պետքարտուղարության խոսնակ Մեթյու Միլլերը հայտարարել է, որ «մեղադրանքները կտրականապես կեղծ են»:

Ընտրություններին «օտարերկրյա միջամտության» մասին խոսում է նաև Վրաստանի կառավարությունը։ Վարչապետ Իրակլի Կոբախիձեի խոսքով՝ «արտաքին միջամտությունը չի կարող ազդել ընտրությունների արդյունքների վրա»։