Անթույլատրելի է բռնության ու բռնություն գործադրող խմբերի խրախուսումը․ Զուրաբիշվիլին «Փրայդի փառատոնի» մասին

«Վրաստանի նախագահը կարծում է, որ խոսքի և արտահայտվելու ազատությունը մարդու հիմնարար իրավունքն է, և այն, ինչ հակասում է այս սկզբունքին, անընդունելի է։ Անթույլատրելի է խրախուսել բռնությունն ու բռնի խմբերին: Վրաստանի նախագահը կոչ է անում համապատասխան մարմիններին ապահովել «Փրայդի փառատոնի» անվտանգ անցկացումը և մասնակիցների խոսքի ու արտահայտվելու ազատությունը, որը պաշտպանված է Սահմանադրությամբ»,- ասված է հայտարարության մեջ։

Նախագահի հանձնարարությամբ «Փրայդի փառատոնին» ներկա կլինի նաև մարդու իրավունքների հարցերով իր խորհրդականը։

Այսօր՝ հուլիսի 8-ին, «Թբիլիսի Փրայդի» շաբաթվա շրջանակներում Թբիլիսիում՝ փակ տարածքում կանցկացվի փառատոն, որը ԼԳԲՏՔ+ համայնքն անցկացնում է արդեն երրորդ տարին։ Հոմոֆոբ և բռնի խմբերը կեղծ տեղեկություններ են տարածել, թե իբր Թբիլիսիի փողոցներում նախատեսվում է այսպես կոչված գեյ-շքերթ անցկացնել, և այս կերպ փորձում են մոբիլիզացնել քաղաքացիներին, այդ թվում՝ շրջաններից։ Ռուսամետ, բռնի և հոմոֆոբ կուսակցության՝ «Պահպանողական շարժում/Ալտ-Ինֆոյի» առաջնորդ Կոնստանտինե Մորգոշիան սպառնացել է, որ «հուլիսի 8-ը կլինի հուլիսի 5-ին կանգնեցված դագաղի վերջին մեխը»։

ՆԳՆ-ն կոչ է արել նշված խմբերին «պահպանել օրենքով սահմանված կարգը, ենթարկվել ոստիկանության օրինական պահանջներին և դուրս չգալ օրենքով թույլատրված հավաքների և ցույցերի իրավունքի շրջանակներից»։ Նախարարությունից հայտնում են, որ հակառակ դեպքում ոստիկանությունը կգործի իր մանդատի համաձայն։

ՆԳՆ-ից հայտնել են, որ փակ միջոցառումը խաղաղ իրավիճակում անցկացնելու համար անհրաժեշտ բոլոր վայրերում մոբիլիզացվելու են ոստիկանության ստորաբաժանումները, որոնք իրենց իրավասության սահմաններում կպաշտպանեն օրինականությունն ու անվտանգությունը։