«Ազատություն» ռադիոկայանը դատի է տվել ԱՄՆ-ի համաշխարհային մեդիա գործակալությանը

Բողոքի համաձայն՝ Կոնգրեսի կողմից հատկացված միջոցների փոխանցումից հրաժարվելը խախտում է օրենքները և ԱՄՆ Սահմանադրությունը, որը Կոնգրեսին բացառիկ լիազորություն է տալիս դաշնային ծախսերի նկատմամբ։ Գործը քննվում է Միացյալ Նահանգների Կոլումբիայի շրջանային դատարանի կողմից:

«Հիմա ժամանակը չէ տրվելու Ամերիկայի թշնամիների քարոզչությանը և գրաքննությանը: Մենք կարծում ենք, որ օրենքը մեր կողմն է, և վաղաժամ է տոնել մեր մահը ողջ աշխարհի դեսպոտների ձեռքով», - ասել է «Ազատություն» ռադիոկայանի նախագահ Սթիվեն Կապուսը:

«Ազատ Եվրոպա» ռադիոկայանը առաջին անգամ սկսել է հեռարձակվել Լեհաստանում, Չեխոսլովակիայում, Հունգարիայում, Ռումինիայում և Բուլղարիայում 1950 թվականին, իսկ 1953 թվականից Խորհրդային Միությունում գործում էր «Ազատություն» ռադիոկայանը:

Լրատվամիջոցների գործունեությունը ֆինանսավորվում է Կոնգրեսի կողմից՝ Միացյալ Նահանգների Գլոբալ ԶԼՄ-ների գործակալության (USAGM) միջոցով:

USAGM-ին և նրա պաշտոնյաներին ուղղված բողոքում ասվում է, որ մարտի 17-ին «Ազատություն» ռադիոկայանը գործակալությանը ներկայացրել է 7 464 559 դոլարի հաշիվ-ապրանքագիր, սակայն գումարը չի ստացել, ինչը առաջին անգամ է տեղի ունեցել իր 75-ամյա պատմության մեջ։

Բողոքում ասվում է, որ օրենքով նախատեսված միջոցների հասանելիության մերժումն աննախադեպ է, և եթե ֆինանսավորումը չերկարաձգվի, «Ազատություն» ռադիոկայանը ստիպված կլինի դադարեցնել գործունեությունը Եվրոպայի և Ասիայի 23 երկրներում։

Նախագահ Դոնալդ Թրամփը մարտի 14-ին գործադիր հրաման է ստորագրել Միացյալ Նահանգների Գլոբալ ԶԼՄ-ների գործակալության (USAGM) չափը կրճատելու մասին: Արդյունքում դադարեցվել է Ամերիկայի Ձայնի աշխատանքը։ «Առաջին անգամ 83 տարվա մեջ լեգենդար Ամերիկայի Ձայնը լռեց»,- մարտի 16-ին ասել է կազմակերպության տնօրեն Մայքլ Աբրամովիցը։

Այս թեմայով՝

Չեխիայի արտգործնախարարի խոսքով՝ Եվրոպան պետք է պահպանի «Ազատություն» ռադիոկայանը