Բնակչության 64 տոկոսի շահերը երկրում ոչ մի կուսակցություն չի ներկայացնում. NDI

Հարցին, թե Վրաստանում կա՞ ձեր շահերը ներկայացնող գոնե մեկ կուսակցություն, հարցվածների միայն 24%-ն է պատասխանել, որ նման կուսակցություն կա, ինչը ռեկորդային ցածր ցուցանիշ է։ 64%-ի կարծիքով՝ նման կուսակցություն չկա, 9%-ը չգիտի, իսկ 2%-ը հրաժարվել է պատասխանել։

Նշենք, որ «Վրացական երազանքի» կողմնակիցների 14%-ը և ընդդիմադիր կուսակցությունների աջակիցների 36%-ը կարծում են, որ ոչ մի քաղաքական կուսակցություն չի ներկայացնում իրենց շահերը։ Կուսակցությունների նկատմամբ թերահավատությունը հատկապես երիտասարդ տարիքային խմբի (18-34 տարեկան բնակչություն) շրջանում է. միայն 15%-ն է ասում, որ առնվազն մեկ քաղաքական կուսակցություն արձագանքում է իրենց շահերին։ 2022 թվականի դեկտեմբերի հետազոտության արդյունքներով այս ցուցանիշն ավելի բարձր էր՝ 23%:

Հարցման համաձայն՝ բնակչության գրեթե կեսը՝ 47 տոկոսը, կարծում է, որ իշխող «Վրացական երազանք» կուսակցությունը չի գործում ժողովրդի և երկրի շահերին համապատասխան։ Ավելի շատ՝ 61%-ը նույն կարծիքին է խորհրդարանում և տեղական ինքնակառավարման մարմիններում ընտրված ընդդիմադիր կուսակցությունների մասին։

«Վրացական երազանքն» ամենաշատ աջակիցներն ունի 55+ տարիքային խմբում, իսկ ամենաքիչը՝ 18-34 տարեկանների շրջանում։ Նույնն է նաև «Միացյալ ազգային շարժման» տվյալները։ Հենց երիտասարդներն են կազմում այն քաղաքացիների մեծամասնությունը, որոնք ասում են, որ ոչ մի կուսակցության չեն համակրում:

Հարցին՝ եթե վաղը լինեին խորհրդարանական ընտրություններ, ո՞ր կուսակցության օգտին կքվեարկեիք, պատասխանները բաշխվել են հետևյալ կերպ՝ 34%-ը՝ ոչ մեկին, 26%-ը՝ չգիտի, 20%-ը՝ «Վրացական երազանք», 9%-ը՝ հրաժարվում է պատասխանել, 5%-ը՝ «Միացյալ ազգային շարժում», 6%-ը՝ այլ կուսակցություններ։

Ինչպես նշում են հետազոտության հեղինակները, կուսակցությունների աջակցության անհատական ​​ցուցանիշներն այնքան ցածր են, որ դրանք չեն կարող օգտագործվել ընտրությունների արդյունքները կանխատեսելու համար։

Վրաստանի քաղաքացիները դեռևս վճռականորեն աջակցում են Եվրամիության հետ սերտ քաղաքական (54%) և տնտեսական (52%) համագործակցությանը: Սակայն, չնայած նման նկրտումներին, բնակչության մեծամասնության կարծիքով, Վրաստանի կառավարությունը բավարար քայլեր չի ձեռնարկում, որպեսզի երկիրը անդամակցի Եվրամիությանը։

Յուրաքանչյուր երկրորդ քաղաքացի (51%) ասում է, որ չի վստահում վրացական ոչ մի հեռուստաալիքի, ինչը զգալի աճ է 2019 թվականից հետո, երբ այդ ցուցանիշը 20 տոկոս էր։

Հարցման տվյալները վկայում են նաև քաղաքականության մեջ ավելի շատ կանանց մասնակցության ցանկության մասին: Սա ապացույց է, որ քաղաքացիները ցանկանում են փոփոխություններ կատարել քաղաքական դիսկուրսում և օրակարգում։ 2014 թվականի համեմատությամբ աճել է այն մարդկանց թիվը, ովքեր կարծում են, որ կին և տղամարդ քաղաքական գործիչները հավասարապես ներկայացնում են իրենց շահերը (48%-ից մինչև 56%)։ Այժմ ավելի քիչ մարդ է (ընդամենը 16%) հավատում, որ տղամարդ քաղաքական գործիչները ավելի լավ են ներկայացնում քաղաքացիների շահերը, քան կին քաղաքական գործիչները: Նշենք նաև, որ ավելի շատ մարդիկ են կողմ խորհրդարանում կանանց և տղամարդկանց հավասար բաշխմանը։

Հետազոտությունը հիմվում է մարտի 17-23-ը Վրաստանի չափահաս բնակչության (բացի օկուպացված տարածքներից) շրջանում անցկացված համազգային հեռախոսային հարցման արդյունքների վրա։ Հարցումը ներառում է 1 032 հարցազրույց։ Հետազոտության սխալի միջին սահմանը +/- 2 տոկոս է:

NDI-ի հետազոտությունը ֆինանսավորվում է Մեծ Բրիտանիայի կառավարության, UK aid-ի կողմից: Հետազոտությունն իրականացվել է CRRC Georgia-ի կողմից: