Դա մեզ հետաքրքիր չէ. Ղարիբաշվիլին Պետդեպարտամենտի զեկույցի մասին

«Ես շատ հակիրճ ծանոթացա զեկույցին և այն հիմնական կետերին, որոնք կարևորվել են։ Ցավոք, զեկույցը հիմնված է ոչ օբյեկտիվ, կողմնակալ, սուբյեկտիվ և անարդար եզրակացությունների վրա, որոնք պատրաստվել են այսպես կոչված էլիտար ՀԿ-ների, հասարակական կազմակերպությունների կողմից, ինչն, իհարկե, ցավալի է։ Ուզում եմ նշել, որ ձեր նշած փաստերը չեն համապատասխանում իրականությանը, դրանք ընդամենը շահարկումներ են և առանձին, քաղաքականացված, կողմնակալ անձանց կողմից կեղծ, այսպես ասենք, շինծու տեղեկատվության վրա հիմնված եզրակացություն և զեկույց են։ Դա մեզ հետաքրքիր չէ»,- ասել է Ղարիբաշվիլին՝ մեկնաբանելով ԱՄՆ Պետդեպարտամենտի զեկույցը։

Վարչապետը հավելել է, որ Վրաստանում կան հարյուրավոր հասարակական կազմակերպություններ, որոնք «սխալ տեղեկություն են տարածում ամբողջ աշխարհում և փորձում վարկաբեկել մեր երկրի, մեր պետության իմիջը»։

«Չնայած այս ամենին, դուք տեսնում եք, որ այսօր լիակատար ազատություն կա ոչ կառավարական հատվածի, լրատվամիջոցների համար, ամենուր... Այստեղ, օրինակ, ներկայացնում եք «TV Պիրվելին», որը շատ քննադատական ​​է, հաճախ, մեծ մասամբ, փաստերի վրա չեք հիմնվում, չեք ստուգում ու հասարակության հետ խոսում եք ստերով, սուտ եք տարածում, բայց դա նորմալ է, դա ժողովրդավարության մաս է, մենք դեմ չենք։ Մենք դրան հակադրվում ենք ճշմարտությամբ, և ոչ մի զեկույց չի կարող դիմակայել ճշմարտությանը»,- ասել է Ղարիբաշվիլին։

«Վրացական երազանք» կուսակցության նախագահ Իրակլի Կոբախիձեի խոսքով, իրենք ուշադիր կուսումնասիրեն Պետդեպարտամենտի զեկույցը, իսկ որտեղ օբյեկտիվ փաստարկների վրա հիմնված քննադատություն լինի, դրանք հաշվի կառնվեն։

«Կարող է լինել քննադատություն, որը հիմնված չէ օբյեկտիվ հանգամանքների վրա՝ մենք համապատասխան արձագանք կունենանք։ Իրականում, մենք բազմիցս խոսել ենք, որ կոնկրետ կազմակերպություններ արտաքին ազդեցության գործակալներ են, հետևաբար, այստեղ գործ ունենք մեկ սուբյեկտի հետ՝ այն, ինչ գրված է Պետդեպարտամենտի զեկույցում և այն, ինչ ասում են ՀԿ-ները, գործնականում նույնն են։ Այսպիսով, այս հայտարարությունների միջև տարանջատում հնարավոր չէ։ Սա մեր ընդհանուր վերաբերմունքն է։ Եթե ​​լինի օբյեկտիվ քննադատություն, իհարկե, մենք դա հաշվի կառնենք եւ կփորձենք առավելագույնս արտացոլել այս ամենը մեր գործողությունների մեջ»,- ասել է Կոբախիձեն։

Պետքարտուղարությունը Վրաստանի վերաբերյալ իր տարեկան զեկույցում գրել է, որ 2022 թվականին Վրաստանի կառավարությունը քայլեր է ձեռնարկել որոշ պաշտոնյաների կողմից կատարված հանցագործությունները հետաքննելու համար, թեև անպատժելիությունը մնում է խնդիր։ Զեկույցում նշվում է, որ կառավարությունը չի կարողացել հետաքննել 2021 թվականի հուլիսին «Արժանապատվության երթի» դեմ իրականացված բռնությունը ու պատասխանատվության չի ենթարկել կազմակերպիչներին, իսկ անցյալ տարի նույնպես շարունակվել է հաշվետվողականության պակասը 2019 թվականի հունիսի ցույցերի ժամանակ լրագրողների և ցուցարարների նկատմամբ ոստիկանության ոչ պատշաճ ուժի կիրառման և 2017 թվականին ադրբեջանցի լրագրող և ակտիվիստ Աֆղան Մուխթարլիի առևանգման և տեղափոխման դեպքերի վերաբերյալ:

Պետքարտուղարությունը գրում է, որ Աֆղան Մուխթարլիի դեպքը ևս մեկ անգամ ուշադրություն է գրավել 2022 թվականին, երբ Պետանվտանգության ծառայության ղեկավարի նախկին տեղակալ Իոսեբ Գոգաշվիլին ասել է, որ Մուխթարլին առևանգվել է «Վրացական երազանքի» հիմնադիր Բիձինա Իվանիշվիլիի հրամանով։

Զեկույցում խոսվում է նաև դատական ​​համակարգում առկա խնդիրների մասին. «Դատական համակարգի նկատմամբ վստահությունը խախտված է, առկա են դատական իշխանության անկախությանն ու անաչառությանը միջամտելու նշաններ, դատավորները խոցելի են քաղաքական ճնշումների համար ինչպես դատական համակարգի ներսում, այնպես էլ նրա սահմաններից դուրս քաղաքականապես զգայուն թեմաներին կամ անձանց վերաբերող գործերում: 2022 թվականին համոզիչ հայտարարություններ տարածվեցին այն մասին, որ դատարանի ազդեցիկ «կլանի» որոշ անդամներ կոռումպացված են»։

Զեկույցի այն ենթաբաժնում, որը վերաբերում է քաղբանտարկյալներին, հիշատակվում են «Մթավարի արխի» հեռուստաընկերության գլխավոր տնօրեն Նիկա Գվարամիան և Վրաստանի նախկին նախագահ Միխեիլ Սաակաշվիլին։ Նշվում է, որ հանրային պաշտպանը, հասարակական կազմակերպությունները, ընդդիմադիր կուսակցությունները և միջազգային խմբերը (ներառյալ Amnesty International-ը և Committee to Protect Journalists-ը) քննադատել են Գվարամիայի դեմ 2022 թվականի մայիսի 16-ի կայացված դատավճիռը, որով նա դատապարտվել է երեք տարի և վեց ամիս ժամկետով ազատազրկման։ Պետքարտուղարությունը մեջբերել է Amnesty International ՀԿ-ի գնահատականը, ըստ որի Գվարամիայի դատավճիռը ցույց է տալիս «կառավարության աճող ազդեցությունը դատարանների վրա մի շարք գործերում, որոնք ուղղված են ճնշելու իր քննադատներին և հակառակորդներին»: