Դեսպանի խոսքով, այս իրավիճակում Վրաստանը Բունդեսթագից անդամակցության համար համաձայնություն չի կարող ստանալ

Ֆիշերի խոսքով՝ Թբիլիսի կատարած այցից հետո նման եզրակացություն է արել Բունդեսթագի ԵՄ հարցերով հանձնաժողովի նախագահ Անտոն Հոֆրեյթերը։

«Խորհրդարանի անդամ, Բունդեսթագի Եվրոպական միության հարցերով հանձնաժողովի նախագահ Անտոն Հոֆրեյթերը 24 ժամ Թբիլիսիում էր։ Եզրակացություն. Գերմանիայի սահմանադրության 23-րդ հոդվածը և հատուկ օրենքը (գերմանացի իրավաբանների համար՝ EUZBBG) պահանջում են խորհրդարանի համաձայնությունը անդամակցության բանակցություններ սկսելու համար: Ներկա իրավիճակում ոչ մի շանս չկա, որ դա տեղի կունենա Վրաստանի համար»,- գրել է Պիտեր Ֆիշերը X հարթակում։

Անտոն Հոֆրեյթերը Կովկաս կատարած այցի շրջանակներում Վրաստանում էր և հանդիպել է Վրաստանի նախագահ Սալոմե Զուրաբիշվիլիին։ Նախագահի աշխատակազմի տարածած տեղեկության համաձայն՝ հանդիպմանը Սալոմե Զուրաբիշվիլին խոսել է ընտրությունների և նախընտրական շրջանում բացահայտված ամենալուրջ և համակարգված խախտումների մասին, որոնք անմիջական ազդեցություն են ունեցել ընտրությունների արդյունքների, քվեարկության գաղտնիության վրա, որոնցով խախտվել է ընտրողների ազատ կամարտահայտությունը և քվեարկության համընդհանուրությունը։ Հանդիպմանը խոսվել է նաև երկրում Ռուսաստանի կողմից մղվող հիբրիդային պատերազմի մասին։ Բացի այդ, ըստ աշխատակազմի, Զուրաբիշվիլին ընդգծել է, որ երկրի համար եվրոպական ուղին այլընտրանք չունի և վրաց ժողովրդի անսասան ձգտումն է շարժվել դեպի եվրաինտեգրում։

Այս թեմայով՝

Բունդեսթագը պահանջում է, որ մինչև ռուսական օրենքի չեղարկումը Վրաստանը ԵՄ-ում առաջխաղացում չունենա